"Эрдэнэс Тавантолгой" ХК ногдол ашиг тараана гэх мэдээлэл цахим орчин тарж байна. Мөн зарим иргэд ч Сар шинийн баярын өмнө "тараа" хэмээн хэвлэлийн хурал хийж, шаардлага хүргүүлж буй.
Тэгвэл ногдол ашиг тараах боломжтой эсэх талаар тус компанийн Үнэт цаас, санхүүжилтийн хэлтсийн Ахлах мэргэжилтэн Л.Ганболдоос дараах тайлбарыг өглөө.
Тэрээр "Өнгөрсөн он буюу 2022 оны жил эцсийн тайлан одоо гарч дуусаж байгаа. Тайлан дууссаны дараа аудитаар шалгуулж, баталгаажуулдаг юм. Үүний дараа ТУЗ хуралдаж, дээрх тайлантай танилцана. ТУЗ хуралдсаны дараа хувьцаа эзэмшигчдийн хурлаар ногдол ашиг тараах эсэхийг шийддэг юм. Хувьцаа эзэмшигчдийн хурал 3-4 дүгээр сард болдог. Тэгэхээр тэр хугацаа хүртэл ногдол ашиг тараах эсэхийг урьдчилан хэлэх боломж байдаггүй" хэмээлээ.
Монгол Улсын Засгийн газар 2012 онд "Эрдэнэс Тавантолгой" ХК-ийн нийт хувьцааны 20 хувь болох гурван тэрбум ширхэг хувьцааг иргэн бүрд үнэ төлбөргүйгээр эзэмшүүлсэн байдаг.
Ингэхдээ иргэн бүрд 1072 хувьцаа ногдсон. Нэг ширхэг хувьцааны нэрлэсэн үнийг нь 933 төгрөгөөр үнэлсэн байдаг.