Монголын Боловсрол, шинжлэх ухааны үйлдвэрчний эвлэлийн Холбооноос өнөөдөр цаг үеийн асуудлаар мэдээлэл хийлээ. Тэдний зүгээс Боловсролын салбарын ажилтны цалинг инфляцын түвшнээс давуулан нэмэхийг шаардаж байгаагаа илэрхийлсэн юм.

Монголын Боловсрол, Шинжлэх Ухааны Үйлдвэрчний Эвлэлийн Холбооны дарга З.Цогтгэрэл "МҮЭХ болон Монголын Боловсрол, Шинжлэх Ухааны Үйлдвэрчний Эвлэлийн Холбооноос 2021, 2022 оны инфляцын түвшинтэй уялдуулж 2023 оны төсөвт санал хүргүүлсэн боловч эдгээр нь биелэгдэхгүй, хүссэн хэмжээнд хүрэхгүй шийдвэр гарч байна.

Боловсролын салбарын мянга, мянган гишүүдээс нийгмийн баталгаа болсон цалин хөлс 15 хувь нэмэгдэж байгаа нь инфляцаа ч гүйцэхгүй, ядууралд орлоо гэх мэдээллийг ирүүлсээр байна. Нийслэл болон орон нутгийн боловсролын салбарын байгууллагуудаас эдгээр мэдээллийг ирүүлж ойрын хугацаанд шийдвэрлэж өгөхийг шаардаж байна. 

Хөдөлмөр нийгмийн Зөвшилцлийн гурван талт Үндэсний хороогоор 2023 оны төсвийг хэлэлцэхдээ нийгмийн Зөвшилцлийн гурван талаар хэлэлцсэнгүй. Үүнийг бид эсэргүүцэж байна.

Засгийн газрын 488 болон 491 дүгээр тогтоолыг эсэргүүцэж байна. Эдгээрээс үзэхэд ТҮ-ний 1-3 буюу төрийн үйлчилгээний үйл ажиллагаа хангадаг ажилтнуудын цалин хөлс хамгийн доод тал нь 41,000 төгрөг, дээд тал 79,000 нэмэгдсэн тогтоол гарсан. Гэвч 2023 оны нэгдүгээр сарын 1-нээс мөрдөж байгаа хөдөлмөрийн хөлсний доод хэмжээтэй харьцуулахад 15,000 төгрөгөөр нэмэгдсэн нь хөдөлмөр эрхэлж буй хүмүүсийн дургүйцлийг хүргэсээр байна.

Цалин хөлсийг 50-аас доошгүй хувиар нэмэгдүүлэх хэлэлцээр хийж баталгаажуулсан ч өнөөдрийн байдлаар үр дүнд хүрээгүй.

2023 оны нэгдүгээр сарын 9-ний өдөр ХНХЯ болон БШУЯ-нд албан ёсоор мэдэгдэж, шаардлага хүргүүлсэн боловч өнөөдрийг хүртэл хариу ирээгүй байгаа нь биднийг үл тоосон гэж үзэж байна.

2022 оны гуравдугаар сарын 9-нд Засгийн газрын 107 дугаар тогтоол гарсан үүнээс хойш ТҮ-ний хэвийн үйл ажиллагааг хангадаг ажилтнууд, ТҮ-ний шинжлэх ухааны байгууллага, соёл урлагийн байгууллага, мэргэжлийн боловсролын байгууллагын цалин хөлс нэмэгдээгүй.

Засгийн газрын 488 болон 491 дүгээр тогтоолыг үндэслээд төрийн тусгай, захиргаатай барьцаагүй. Хөдөлмөр эрхэлж байгаа иргэд цалингаараа амьдрал ахуйгаа залгаж байгаа. 

Боловсролын салбарт ажиллаж байгаа, улс орныхоо тусгаар тогтнолыг хамгаалж байгаа хүмүүсийн цалин хөлсийг хоёрдугаар сард багтаан 50 хувиар нэмэгдүүлэхийг шаардсаар байна. Өөрсдийн хөдөлмөрт тохироогүй цалин хөлс өвч хөдөлмөрийн мөлжлөгт өртөж, хүний нөөцийн дутагдалд орж, боловсролын салбарт ажилласнаар ялгаварлан гадуурхагдаж буй эдгээр асуудалд төр засаг бодлогын түвшинд анхаарах хэрэгтэй.

Сурагчдын хоёрдугаар улирлын хичээл эхлэх гэж байгаа боловч бүх сургууль 4-5 хүний нөөцийн дутагдалд орлоо гэсэн зарууд вэб сайтуудаар гарч байна.

Боловсролын салбарт орон тоо дутагдсанаар 2-3 хүний ажлыг 1-2 хүн хийж байгаа нь нормоосоо 1.5-2 дахин илүү ажлыг хийж хөдөлмөрийн мөлжлөгт өртсөөр байна. Энэ бүхнийг дуугүй хараад байж чадахгүй, дуу хоолойгоо илэрхийлж, цаашдаа эрхзүйн хүрээнд тэмцэх шийдвэрийг Боловсрол шинжлэх ухааны салбарын ажилтнууд гаргасан" гэлээ.