Халтиргаа гулгаанаас сэргийлэх зорилгоор нийслэлийн хэмжээнд "Ердөө 90 минут" бүх нийтийн их цэвэрлэгээг өнөөдөр зохион байгууллаа.

Өдөр 11:00-12:30 цагийн хооронд үргэлжилсэн уг цэвэрлэгээнд нийслэлийн нутгийн захиргааны 72 байгууллагын 2186 албан хаагч, хот, дүүргийн тохижилт үйлчилгээний байгууллагын 1389 ажилчин 193 техник хэрэгсэлтэйгээр, мөн хувийн хэвшлийнхэн оролцож, хуваарийн дагуу оноосон талбайн цас, мөсийг цэвэрлэлээ.

Улаанбаатар хотын Ерөнхий менежер бөгөөд Захирагчийн ажлын албаны дарга М.Баяраа “Зам талбайн цэвэрлэгээ, үйлчилгээг хариуцан ажиллаж буй албан хаагч стандартаараа өдөрт 10 мянган ам метр талбай цэвэрлэх нормтой. Гэхдээ ажиллах хүн хүчний хүрэлцээ хомс зэргээс шалтгаалан одоогоор нэг үйлчлэгчид 13 мянган ам метр, заримдаа түүнээс ч их хэмжээтэй талбай ноогддог, ачаалал маш их. Тиймээс иргэд, аж ахуйн нэгжийг хамруулсан их цэвэрлэгээг зохион байгуулж байна. Цаашид тодорхой хуваарийн дагуу, жилд зургаан удаа их цэвэрлэгээг зохион байгуулахаас гадна хот тохижилтын үйлчилгээнд ашиглах машин техникийн хүрэлцээг нэмэгдүүлэхэд онцгой анхаарна” гэлээ.

Харин ОСНААУГ-ын Хэрэглэгчдэд үйлчлэх төв 5-ын дарга Ц.Амарсайхан “Хог хаягдлын тухай хуулийн дагуу манай байгууллага ойр орчмынхоо 50 ам метр талбайн хог хаягдал, цас, мөсийг байнга цэвэрлэдэг. Өнөөдөр манай байгууллагын 82 албан хаагчийн 50 гаруй нь цэвэрлэгээнд оролцож байна” гэсэн юм.

Мөн НЗДТГ-ын ахлах мэргэжилтэн Д.Тэгшжаргал “Хотын цэвэр цэмцгэр байдал, өнгө үзэмжийг сайжруулахад иргэдийн оролцоо чухал. Өнөөдрийн их цэвэрлэгээнд  НЗДТГ-ын 60 гаруй ажилтан, албан хаагч хоёр ээлжээр оролцож, МУИС-ийн урд, ХУИС-ийн хойд замыг хариуцан цэвэрлэлээ” хэмээн онцлов.