Монгол Улс ардчилсан шинэ Үндсэн хуулиа баталсан тэмдэглэлт өдөр маргааш болно. Энэ өдөр УИХ-ын Хүндэтгэлийн чуулган хуралдаж, шинэ Үндсэн хуулийг батлахад оролцсон АИХ, УБХ-ын гишүүд урилгаар оролцдог уламжлалтай. Тэгвэл энэ өдөр иргэн Ц.Булганжаргал шинэ Үндсэн хуулийн өдрийн Хүндэтгэлийн чуулганд үгээ хэлэхээр УИХ-ын даргад хүсэлт гаргажээ.

Сануулахад, өнгөрөгч оны төгсгөлд Ерөнхий сайд Л.Оюун-Эрдэнэ нүүрсний экспортод гарсан хулгай, хууль бус үйлдлүүдийг таслан зогсоох, үүнд оролцсон албан тушаалтан, аж ахуйн нэгжүүдийн удирдлагатай хуулийн дагуу хариуцлага тооцохоо зарласны дараа иргэд, залуучуудын төлөөлөл дээрх хууль бус үйлдлийг эсэргүүцэн хотын төв талбайд жагсаал цуглаан зохион байгуулж эхэлсэн билээ. Эсэргүүцлийн жагсаал цуглаан сар гаруй үргэлжилж, Ерөнхий сайд Л.Оюун-Эрдэнэ жагсагчитай уулзан зөвшилцөл хийх гэж оролдсон боловч үр дүнд хүрээгүй бөгөөд эцэст нь цагдаагийн байгууллага уг жагсаалыг хүч хэрэглэн тараахад хүрсэн.

Энэ жагсаалын үеэр нэгэн иргэн Зэвсэгт хүчин, дотоодын цэрэг, цагдаагийн алба хаагчдын ар гэрийн төлөөлөн жагсаалд нэгдэж, Энхийг сахиулах ажиллагаанд оролцсон цэрэг дайчдын томилолтын мөнгө буюу НҮБ-аас олгодог цалингаас татвар авч ирснийг эсэргүүцэж, өнгөрсөн 20 жил гаруйн хугацаанд дайны галын цэгт ажилласан цэнхэр дуулгатнуудын цалингаас авсан татвараа буцаан өгөх, цэрэг, цагдаагийн албан хаагчдын цалинг арав дахин нэмэгдүүлэхийг шаардаж буйгаа мэдээллийн зарим сайтуудаар ярьсан байдаг.

Мөн энэ асуудлаар Ерөнхийлөгч, УИХ-ын дарга, Ерөнхий сайд нарт шаардлага өгсөн боловч шаардлагын хариуг авч чадаагүй иргэн н.Булганжаргал маргааш болох Хүндэтгэлийн чуулганд Монгол Улсын иргэний хувиар оролцож үгээ хэлэх, үзэл бодлоо илэрхийлэхээр УИХ-ын дарга Г.Занданшатарт хүсэлт гаргасан байна.