Монгол улсын нийслэл Улаанбаатар хотод утаа, түгжрэлийн асуудал хүндэрсээр байгаа. Өнгөрсөн хавар нийслэлд "тэг" зогсолт болж байсан бол баасан гаригт их хэмжээний цас орсны улмаас замын хөдөлгөөн "тэг" зогссон.

Олон цаг үргэлжилсэн энэхүү тэг зогсолтын талаар Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар өөрийн твиттер хаягаараа дараах байр сууриийг илэрхийлжээ. 

Тэрээр "Архаг түгжрэлийг нэг өвлийн хугацаанд бууруулах үндсэн хоёр арга зам бий... - Иргэд, албан тушаалтнууд бүгд сайн дураар идэвх санаачилгатай өөрийн чадах хувь нэмрээ оруулах; -Тодорхой хугацаанд машины тоог дугаарын хязгаарлалт (албадлага) зэрэг захиргааны аргаар зохицуулах" хэмээн жиргэсэн байна.

Мөн тэрээр "Нийтийн тээврийн салбар дөнгөн данган аргацаасан байдалд орсон байхад бид дараа дараачийн ямар ч том арга хэмжээнүүдийг авах боломж хязгаарлагдмал болчхоод байгаа юмаа" гэсэн байна.

Харин дарга нарын зам хааж, түгжрэл үүсгэдэг асуудлыг зогсоох талаарх саналаа өнгөрсөн долоо хоногт хуулийн төсөлд албан ёсоор явуулсан гэжээ.