Туул, Сэлбэ гол орчмыг тохижуулахад БНСУ-аас туршлага судлахаар болсныг Нийслэлийн Засаг дарга Д.Сумъяабазар мэдээлсэн бөгөөд төслийн удирдагчаар соошил орчинд Цэцэг Бямбаа нэрээр алдаршсан жүжигчин Б.Цэцэг ажиллаж байгаа тухай олон нийт саяхан мэдсэн билээ.

Тэгвэл энэ хамтын ажиллагаа нэлээд эрт буюу өнгөрөгч тавдугаар сард эхэлжээ. Энэ тухай төслийн удирдагч Б.Цэцэгийн олон нийтэд хийсэн зарим мэдээлэлтэй холбогдуулан хотын дарга Д.Сумъяабазар уучлалт гуйж, тайлбар хийхийг "Creative100" хотын дизайны мэргэжлийн залуучуудын сайн дурын хөдөлгөөний залуус шаардлаа.

Болсон явдлыг тодруулбал, лхагва гаригт Zarig.mn сайтын "Хоёр тал" ярилцлагын нэвтрүүлэгт оролцсон Туул, Сэлбэ гол орчмыг сайжруулах төслийн удирдагч Б.Цэцэг "Тавдугаар сарын 26-нд Хотын дарга Д.Сумъяабазар намайг дуудаад, очиж уулзсан. Олон нийттэй хамааралтай холбоотой ажил юм болов уу гэсэн баримжаатай очиход санал болгосон зүйл нь таамгаас зөрсөн. Нийгмийн эрх ашгийг хүндэтгэсэн төсөл хөтөлбөр бөгөөд 2013 оноос хойш яригдаад өнөөдрийг хүртэл хэрэгжээгүй явж байгаа төсөл хөтөлбөр гэсэн. Тэгээд иргэний нийгмийн дуу хоолой болсон танд санал болгож байна гээд Туул, Сэлбэ гол орчмын төслийг судалж үзэх санал тавьсан. Би судалсны үндсэн дээр холбогдох хүмүүстэй нь уулзаад, төслийн гацалтыг яаж гаргах вэ зэрэг стратеги боловсруулж эхэлсэн. Иргэдийн оролцоотой хөдөлгөх үүднээс төслийн нэгж болгож хувиргаад, бие даасан байгууллага болгож байж энэ төсөл цааш явах юм байна гээд Засаг даргад хүсэлт тавьсан.

Мөн би хадгаламжийнхаа хугацааг цуцлуулаад хүмүүсийнхээ билетийг авсан, төрийг хараад нэмэргүй юм байна гээд... Нийт 10,728,400 төгрөгийг өөрийнхөө хадгаламжаас гаргасан. Үүний үр дүн нь сайн байсанд баярлаж байна” хэмээн ярьжээ.

Түүний хийсэн энэ мэдээлэл болон Цэцэг Бямбааг төслийн удирдагчаар тавьсан шалтгаанаа тайлбарлахыг "Creative100" хөдөлгөөний залуус хотын дарга Д.Сумъяабазараас шаардлаа.

"ХОТЫН ДАРГА МЭРГЭЖЛИЙН ЗАЛУУЧУУДААС БОЛОН НИЙСЛЭЛИЙН ИРГЭДЭЭС УУЧЛАЛТ ГУЙХ ЁСТОЙ"

"Creative100" хотын дизайны мэргэжлийн залуучуудын сайн дурын хөдөлгөөний зохицуулагч, урбанист Э.Золзаяа өчигдөр хөдөлгөөний албан ёсны пэйж хуудсаар лайв хийж, өөрийн байр сууриа илэрхийлэв. Ингэхдээ,

-"Creative100" хотын дизайны мэргэжлийн залуучуудын сайн дурын хөдөлгөөнийг 2019 оноос хойш мэргэжлийн залуучууд санаачлан явуулж байгаа. Мэргэжлийн залуучуудын хувьд Б.Цэцэг гэдэг хүний энэ яриаг бид доромжлол гэж хүлээн авч байна. 

Тавдугаар сарын эхний долоо хоногт мэргэжлийн хот төлөвлөгч, мэргэжлийн инженер, мэргэжлийн тээврийн салбарын төлөөлөл, дизайнерууд, архитектуруудыг нэгтгэсэн Creative100 холбооноос хоттойгоо хамтран ажиллаж, мэргэжлийн дэмжлэг үзүүлье гээд Хотын даргын үүдийг сахиж, мөргөж сөгдөх шахаж байж хэд хэдэн удаа санал тавьсан юм.  Гэтэл хэдэн зураг үнэгүй хийгээд өгөөч гэсэн. Бид Хотын даргад тодорхой гудамжуудаа хэлээд өгвөл бид өөрсдийн хөрөнгөөр жишиг болгон тохижуулаад үзүүлье гэдэг санал хүртэл тавьсан.

Хотын дарга мэргэжлийн залуучууд хоттойгоо сайн дурын үндсэн дээр хамтарч ажиллая гэхэд хүлээж аваагүй мөртлөө бидний араар /тавдугаар сарын 26-нд/ яагаад Б.Цэцэг гэх хүнийг дуудаж, энэ том ажлыг өгч байгаа юм бэ. Мэргэжлийн залуус нь хотоо сайхан болгоё гэхээр хаалга үүд нь хаалттай. Гэтэл жүжигчин Б.Цэцэгт энэ боломжууд яагаад ногоон гэрлээр нээгдэж, энэ чухал төслийн зохицуулагч хийж байгаа юм бэ?

Цэцэг Бямбаа гэдэг охиныг би багаас нь мэднэ. Бид хоёр танилууд байсан. Ийм мэдлэггүй мал шиг хүмүүсээр өөрийгөө тойруулаад, мэдлэгтэй хүмүүсийг дайсан мэт үзсэнээрээ та Улаанбаатар хотын иргэдийг амьдралын чанарыг шууд доройтуулж байна. Цагаач бол цагаач л байдаг. Бид цагаач шиг амьдрахгүй. Цэцэг Бямбаа мэтийн хогийн, новшийн жүжигчдээр бидний амьдралыг шийдүүлэх гэж байгаа бол эртхэн бүгдээрээ наана, цаанаа ярилцья. 

Тиймээс хотын дарга Д.Сумъяабазараас эхлээд ямар үндэслэлээр энэ хүнийг сонгож, энэ төслийг өгсөн бэ? гэдэг асуултад ул суурьтай, үндэслэлтэй, албан ёсны хариу тайлбар өгч, алдаа гаргаснаа хүлээн зөвшөөрч, мэргэжлийн залуучуудаас болон Улаанбаатар хотын иргэдээс уучлалт гуйх ёстой. Мэргэжлийн бус хүнийг ийм ажилд тавьсан нь Хотын даргад хариуцлага тооцох хангалттай шалтгаан гэж үзэж байна" хэмээн ярив.