Дархан-Уул аймгийн "Оюуны-Ирээдүй" цогцолборын хичээлийн А байрны нэг давхарт нулимс асгаруулагч, амьсгал боогдуулагч хий цацаж тухайн сургуулийн нэгдүгээр ээлжийн 1200 гаруй сурагчийн 150 гаруй нь эмнэлэгт хүргэгдсэн хэрэг өчигдөр гарсан.

Өчигдөр тус газар мэргэжлийн байгууллагууд бүтэн өдөр ажиллаж, сургууль дотор ямар нэгэн хорт хий агаарт тархсан зүйлгүй тул сургалтын үйл ажиллагааг хэвийн явуулж болох дүгнэлт гаргажээ.

Уг үйлдлийг тус сургуулийн 12 дугаар ангийн сурагч эрэгтэй С үйлдсэн бөгөөд эмэгтэй Э-ийн цүнхнээс авч цацжээ. 15:00 цагийн орчимд 94 хүүхэд, найман том хүн эмнэлгийн тусламж авч байсан бол оройн 17:00 цагийн мэдээллээр 6-12 дугаар ангийн 142 сурагч, 16 багш, ажилтан нийт 158 хүн хоолой боогдох, амьсгал бачуурах, ханиалгах, дотор муухайрах, бөөлжих, цээжээр өвдөх шинж тэмдэг, зовуурьтай эмнэлэгт хүргэгдэн тусламж үйлчилгээ авчээ.

19:00 цагийн байдлаар гурван сурагч хүүхдийн тасгийн түр ажиглалтад байсан бөгөөд бусад багш, сурагч, ажилчид эмнэлгийн тусламж, үйлчилгээ, зөвлөгөө авсны дараа гэртээ харьжээ.

Гэхдээ нөхцөл байдлаас үүдэн Нэгдсэн эмнэлгийн эмч нар өчигдөр шуурхай байдалд шилжин 00:00 цаг хүртэл ажиллаж шаардлагатай тохиолдолд ирсэн багш, сурагч, ажилтнуудад тусламж үйлчилгээг үргэлжлүүлжээ.

Тухайн сургууль нь химийн лабораторитой бөгөөд гурван давхарт байрлах химийн лабораториас ямар нэг бодис алдагдаагүй нь мөн тогтоогджээ.

Тиймээс хичээл, сургалтын үйл ажиллагаа хэвийн үргэлжлэх бөгөөд айж, сандрах зүйлгүй гэж мэргэжлийн байгууллагууд мэдэгдлээ.

Мөн амьсгал боогдуулагч, нулимс асгаруулагч биедээ авч явсан сурагч Э нь өмнө нь Улаанбаатар хотод халдлагад өртөж байсан аж. Давтлага, дугуйлан зэргээс шалтгаалан сургууль дээрээ оройтох тохиолдол их гардаг тул үеэл ах нь биеийг нь хамгаалах зорилгоор уг зүйлийг дүүдээ хотоос авч өгч явуулсан гэж мэдүүлжээ.

Тиймээс эцэг, эх асран хамгаалагчид хүүхдэд тавих хараа хяналтаа сайжруулах хэрэгтэйг аймгийн удирдлагууд зөвлөж байна.

Одоогоор хэрэг мөрдөн байцаалтын шатанд байгаа тул хэрхэн шийдвэрлэх нь тодорхойгүй аж. Нулимс асгаруулагч хий нь хормын төдийд хүний амьсгал боогдуулж нулимс асгаруулдаг. Гэхдээ 20-30 минутын дараа биеэс гадагшилдаг аж.