Төр нь иргэндээ гомдсон хэргийн шүүх хуралдаан гурав дахь өдрөө үргэлжилж, шүүх шийдвэрээ танилцууллаа. 

Өнгөрсөн баасан гаригт эхэлсэн иргэн Э.Одбаяр, Б.Цацрал, Ц.Чинбат, Б.Билгүүн, Л.Ганхөлөг нарт холбогдох эрүүгийн хэргийг шүүх шүүх хуралдаан Баянгол дүүргийн Эрүүгийн хэргийн анхан шатны шүүхийн байранд гурав дахь өдрөө үргэлжлэв.

Тодруулбал, "Цахим үндэстэн" арга хэмжээг эсэргүүцсэн #NoDoubleStandart хөдөлгөөнтэй холбоотой нэг, 461 дүгээр ангиас хүн оргуулж байх явцдаа хууль сахиулагч нарыг эсэргүүцсэн нэг, мөн Дорнод аймагт болсон бусдын машинаар дайрсан хэргийг цахим сүлжээнд тавьсан нэг, сурагчдыг дэгдэж буй бичлэгийг цахим сүлжээнд тавьсан гэх үндэслэлээр дээрх таван иргэнийг Эрүүгийн хуулийн 13.14 болон 23.1.1 дүгээр зүйл ангид холбогдуулж, яллагдагчаар татсан. 

Ийн гурав дахь өдрөө үргэлжилсэн шүүх хуралдаан шийдвэрээ гаргажээ.

Тодруулбал, дээрх таван иргэнийг Эрүүгийн хуулийн 13.14 болон 23.1.1 дүгээр зүйл ангид холбогдуулан шүүсэн бөгөөд тэднийг гэм буруутайд тооцож, тус бүр зорчих эрхийг хязгаарлах ял оноосон байна.

Шүүх хуралдааны дараа Иргэн Л.Ганхөлөг өөрийн цахим хуудаснаа "Биднийг шүүх хурал 3 хоногийн турш тасралтгүй үргэлжилж өнөөдөр Баянгол дүүргийн эрүүгийн хэргийн анхан шатны шүүхээс Э.Одбаярт 1.9 жил хорих, Ц.Чинбатад 1 жил хорих, Б.Билгүүн, Л.Ганхөлөг нарт 8 сар хорих ялыг нээлттэй хорих ангид эдлүүлэх, Б.Бямбагэрэлд 24 сар зорчих эрх хязгаарлах ял оноох саналыг Прокурор гаргасан. Прокурорын саналыг шүүх хэлэлцээд Э.Одбаярт 1.2 жил оршин суугаа дүүргээсээ гарахгүй байх зорчих эрх хязгаарлах ял оноосон бол бусдад нь нэг жилийн хугацаанд зорчих эрх хязгаарлах ЯЛ оноов. Ял авсан ч ямартайч гэртээ, охидууд дээрээ буцаж ирлээ. Давж заалдана…" хэмээн бичжээ. 

Мөн тэрээр нээлттэй шүүх хурлыг зохих ёсны дагуу бэлдэж өгөөгүй гэдгийг дурьдав. "Нээлттэй гэх шүүх хурлыг гаднаас ажиглаж байгаа байдал. Дэлгэцийг 4-өөс илүү хүн харах боломжгүй! Дууг нь спикер дээр нь чихээ наан барин хоёр л хүн чүү ай сонсох хэмжээний…" гэжээ. 

Эрүүгийн хуулийн 13.14 дүгээр зүйлд:

• Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ. 

Мөн хуулийн 23.1 дүгээр зүйлийн 1 дэх хэсэгт:

• Хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ хэмээн заажээ.