2022 онд ЮНЕСКО-оос онцолж буй “Итгэлцлийг бэхжүүлэх: Хэвлэл мэдээлэл мэдээллийн суурь боловсролын ач холбогдол” сэдвийн хүрээнд ЮНЕСКО-ийн Монголын үндэсний коммисс болон Хэвлэл мэдээллийн суурь боловсролын /ХММСБ/ үндэсний сүлжээ, Гэр бүл, хүүхэд, залуучуудын, хөгжлийн газартай хамтран “Үндэсний ХММСБ-ын долоо хоног-Залуучуудын хакатон”-ыг гурван хоног амжилттай зохион байгууллаа.
Гурван өдөр үргэлжилсэн сургалт, багийн ажлын үр дүнд 11 багийн 44 оюутан залуус хэвлэл мэдээлэл мэдээллийн суурь боловсролыг түгээн дэлгэрүүлэх чиглэлээр 11 төсөл боловсруулж, танилцууллаа.
Нэгдүгээр байрт, Хөвсгөл аймгийн Түнэл сумын дунд сургуульд хэвлэл мэдээлэл, мэдээллийн суурь боловсролын чиглэлээр ажиллах төсөл бичсэн "Мэдлэг бол хүч" баг шалгарчээ.
Хоёрдугаар байрт, Сонсголын бэрхшээлтэй оюутан, залууст чиглэсэн "Сонор" төслийг хэрэгжүүлэх төсөл санаачилсан InfoVibe багийн залуус шалгарсан бол удаах байранд Хэвлэл мэдээлэл, мэдээллийн суурь боловсролыг үр дүнтэй нэвтрүүлсэн жишиг сургууль байгуулах төлөвлөгөө танилцуулсан "2Bud" баг шалгарлаа.
Багуудад төсөл хэрэгжүүлэх болон урасшуулал болох мөнгөний шагналыг гардуулав.
- 1 дүгээр байр 1000 ам. доллар (төсөл хэрэгжүүлэх) + 1.000.000 төгрөг
- 2 дугаар байр 500 ам. доллар (төсөл хэрэгжүүлэх) +500.000 төгрөг
- 3 дугаар байр 300 ам. доллар (төсөл хэрэгжүүлэх) +300.000 төгрөг
Мөн тэргүүн байранд орсон багт Faro foundation сангаас VR, AR технологийн мэдлэг олгох сургалтын эрх гардуулсан бол Боловсролын хамтын ажиллагааны нийгэмлэгээс Mily багт, Хэвлэлийн Хүрээлэнгээс Wings багт тус тус тусгай шагнал гардуулсан юм.
Төсөлд шалгарсан багууд 11 дүгээр сарын 1-нээс төслийн ажлаа эхлүүлэх юм.
Дашрамд дурдахад, Хакатоны үеэр хамтран зохион байгуулагч Гэр бүл, хүүхэд, залуучуудын, хөгжлийн газраас шилдэг гурван төслийг санаачилсан залууст дэмжлэг үзүүлж, цаашид хамтран ажиллахад бэлэн гэдгээ илэрхийлсэн юм.
