"BRB" компанийн захирал Б.Энхжаргалан, МУГТ Б.Наранбаатар нар өнөөдөр өмгөөлөгчийн хамт цаг үеийн асуудлаар мэдээлэл хийлээ. 

МУГТ Б.Наранбаатар "Сүүлийн хэд хоног хууль бус хэрэгт холбогдсон мэтээр бичигдсэндээ спортын хамт олноосоо уучлал хүсье. Аав ээж, гэр бүл, найз нөхдөөсөө мөн уучлал хүсэж байна. Цахим сүлжээгээр дамжуулан, биднийг хараалгаж, зүхүүлж, нийгмээр нь үзэн ядуулах үйл явдал болж байгаад харамсаж байна. Зөвхөн би биш миний ард гэр бүл, үр хүүхэд, найз нөхөд, хамт олон байгаа. Энэ бол халдлага. Үнэхээр гэр бүл, найз нөхөд халдлагад өртлөө гэж бодож байна.

Би дасгалжуулагч хүн, түмний хүүхдэд хичээл зааж, амьдралаа залгуулаад явж байгаа хүн. Чөлөөт бөх заагаад, хүмүүжүүлж, нийгэмдээ сайн сайхан зүйл бүтээж, манлайлья гэж бодож яваа залуу. Миний шавь нар, эцэг эхчүүд юу гэж бодох вэ? Хүүхдэдээ хар тамхичин, мөрийтэй тоглогч дасгалжуулагч авчиж гэнэ. Би яаж ажлаа хийж, амь зуулгаа залгуулж явах юм бэ? Би зүгээр л хөдөлмөрлөж байгаа залуу шүү дээ. Гэтэл яагаад мөрөөрөө амьдраад явж байгаа залууг нухчин дарах гэж оролдож байгаа юм бэ? Зүгээр л залуу хүний амьдралыг сүйрүүлж байна шүү дээ. Сүүлийн хоёр хоног би хар тамхичин гэж дуудууллаа. Би үр хүүхэдтэй хүн. Нийгмээрээ миний хүүхдийг хар тамхичны хүүхэд гээд жигшээд, ялгаварлаад эхэлбэл яах вэ? Танай аав хар тамхичин гээд байвал тэр хүүхдийн сэтгэл зүй ямар байх вэ? Энэ байдлаа таслан зогсоохгүй бол дахиад олон залуучуудын амьдрал сүйрнэ.

Өөр дээрээ ийм явдал ирсэн болохоор би сайн мэдэж байна. Нийгэм даяар хар тамхичин, мөрийтэй тоглоомчин гээд зарлуулчихсан хүнд хэн хүүхдээ авчирч, сайн тамирчин болгооч гэж захих юм бэ? Гэмгүй нэгнээ гүтгэж, нийгэм даяар хараалгаж, зүхүүлдэг ийм муухай зүйл хийж болохгүй. Бид тэсэхээ болиод хэвлэлийн бага хурал хийж байна.

Спорт сонирхогчид, ард түмэн үнэн зөвийг мэдээсэй гэсэндээ би энд сууж байна. Хар тамхины шинжилгээг нь өгсөн, эмнэлэгт нь очиж, үзлэгт нь орсон. Ямар ч хар тамхи байхгүй, илрээгүй. Бид нар тэгээд явдаг улсууд ч биш. Би хар тамхичин биш, мөрийтэй тоглоомчин ч биш, зохион байгуулдаг хүн ч биш. Ингээд надаар дамжуулан бусдад ял халдааж байгаа юм шиг, спортын салбарыг тэр чигт нь болдоггүй юм гэж нийгэмд харуулах гэж байгаа юм шиг. Ингэж болохгүй.

Залуучуудаа нухчин дардаг ийм зүйл ахиж битгий гараасай. Хэн нэгний хариуцлагагүй үйлдлээс ажил, амьдралаараа хохирох ёсгүй. Спорт сонирхогчид, ард түмэн үнэнийг ойлгоосой гэж хүсэж байна” гэлээ.