"Өргөө" амаржих газрын захирал Ж.Энхцэцэгийг ёс зүйн дүрэм зөрчсөн асуудлаар аравдугаар сарын 13-ны өдөр ажлаас чөлөөлсөн билээ.

Тэгвэл өнөөдөр ЗГХЭГ-ын яаралтай ажлын хэсэг тус амаржих газар ажиллаж, ажлын хэсгээс өнөөдөр захирал асан Ж.Энхцэцэгийг дуудаж уулзсан байна.

Энэхүү уулзалтын талаар Ж.Энхцэцэг "Би энэ хугацаанд хэрхэн ажилласан талаар танилцуулга хийлээ. Би хувийн эмнэлэгтэй байсан үнэн. Гэхдээ энэ ажлыг хийхийн тулд гэрээгээ цуцалсан. Манай эмнэлэгт эхийн эндэгдэл байхгүй. Өргөө амаржих газарт төрсөн хүмүүсээс мөнгө авч байсан гэх зүйл байхгүй болсон. Ээжүүд тав тухтай орчинд төрж байгаа. Харин дэд захирал П.Эрдэнэцэцэгийг төрийн албаны хуулийн дагуу томилсон. Энэ хүн бол цагдаагийн алба хаагч бус эрх зүйч, эдийн засагч, хуульч хүн. Энэ асуудлыг ярьж байвал хүний эрхийн асуудал ч яригдах байх. Энэ захирлын хувьд 4-5 жилийн өмнө цэргийн тэтгэвэртээ гараад, олон улсын байгууллагад санхүүгийн хяналт шалгалт хийж байсан. Цаашид ажиллаж амьдрах шаардлага байгаа шүү дээ. Би цагдаа гэдэг утгаар нь биш эрхзүйчийн хувиар нь ажиллуулсан. Манай эмнэлэгт 38 настай залуу ч ажиллаж байсан. Эмнэлгийн байгууллага хэл амтай гээд хэлж байсан. Энэ хүмүүсийг эмнэлгийн байгууллагад ажилласнаар нь ялгаварлан гадуурхаж байгаад сэтгэл дундуур байна” гэлээ.