УИХ-ын гишүүн, Цахим хөгжил, харилцаа холбооны сайд Н.Учрал өнөөдөр өөрийн твиттер хуудсаар дамжуулан "Барилга хот байгуулалтын яамтай хамтарч, хаягжилтыг цэгцлэх ажлыг эхлүүлсэн" тухайгаа мэдээлжээ.

“Ертөнцийн зүгээр ярьдаг улс Монголоос өөр үлдсэнгүй. Хаягжилтыг шийднэ" гэсэн гарчиг (лид) бүхий энэ мэдээлэлд,

"Шуудангийн үйлчилгээ, хувь хүн, албан байгууллага, орон сууц, байшингийн хаяг хоорондоо огт зөрөхгүй, тодорхой стандарт хаягтай байх ёстой. Гадны жуулчид байтугай иргэд нь очих газраа олох гэж оньсого таахтай адилхан, ойролцоох барилга байгууламжаа бараадаж амаараа хэлсээр байна.

Хаягжилт нь улс орны хөгжил, дэвшилд нөлөөлөөд зогсохгүй эдийн засгийн хувьд хэмнэлт авчирдаг. Манай улс хаягжилтын асуудлаа шийднэ гээд хэдэн арван жил ярьж, олон хууль, дүрэм, журам боловсруулсан ч асуудлаа шийдэхгүй, нэг газар очоод гацчихдаг. Гэтэл нийгэм цахим технологийн хөгжил, хүн амын суурьшил, шилжилт хөдөлгөөн нь хаягжилтын асуудлыг шинэ түвшинд гаргахыг шаардаж байна. Тиймээс Цахим хөгжил, харилцаа холбооны яам Барилга хот байгуулалтын яамтай хамтарч, хаягжилтыг цэгцлэх ажлыг эхлүүллээ” гэжээ.