Ерөнхий сайд Л.Оюун-Эрдэнэ Холбооны Бүгд Найрамдах Герман улсын Канцлер Олаф Шольцын урилгаар тус улсад аравдугаар сарын 12-15-ны өдөр айлчилж байна. Айлчлалаар яригдаж байгаа зарим асуудлаар Эдийн засаг, хөгжлийн сайд Ч.Хүрэлбаатараас тодрууллаа.
-Ерөнхий сайд бизнес эрхлэгчидтэй уулзсан. Бизнес эрхлэгчдийн зүгээс ямар санал хүсэлт тавьж байна вэ. Мөн анхаарах ёстой ямар асуудал байна вэ?
-Ерөнхий сайдын ХБНГУ-д хийж буй айлчлалын хүрээнд бизнес эрхлэгчдийн төлөөлөлтэй уулзлаа. 2011 онд Монгол Улс Герман улстай ашигт малтмалын салбарт хамтарч ажиллах тухай гэрээ байгуулж байсан. Өнгөт метал, газрын ховор метал болон уул уурхайн бүтээгдэхүүнийг боловсруулах чиглэлээр хамтарч ажиллах тухай асуудал байсан. Тэрхүү гэрээний хүрээнд бизнес эрхлэгчидтэй уулзаж, цаашид хэрхэн хамтарч ажиллах талаар санал бодол солилцлоо. Герман улс авто машин үйлдвэрлэлээр дэлхийд тэргүүлдэг. Цахилгаан авто машин үйлдвэрлэлтэй холбоотойгоор газрын ховор метал, электрон машин үйлдвэрлэлтэй холбоотой зэс, өнгөт металын олборлолттой хамтарч ажиллах боломж нээгдэж байгаа. Үүнээс гадна Германы эдийн засаг хамтын ажиллагааны төрийн нарийн бичгийн дарга Монголд очир үеэрээ хамтарч ажиллах талаар ярьж байсан. Үүнтэй холбогдуулаад сэргээгдэх эрчим хүчний чиглэлээр Монгол Улсад тодорхой хэмжээний хөрөнгө оруулалт хийхээр бэлдэж, мөн тодорхой хэмжээний ажил хийсэн.
-Албан ёсоор тохиролцоонд хүрч, урагшлахаар болсон хэлцэл өрнөсөн үү?
-Сэргээгдэх эрчим хүчний чиглэлээр Монголд үйл ажиллагаа явуулж буй компанийн төлөөллүүдтэй уулзсан. Хөтөлбөрийн дагуу маргаашаас томоохон уулзалтуудаа хийнэ. Түүний өмнө бэлтгэл уулзалтуудыг хийгээд явж байна. Манай улсаас Герман улсад ойрын хэдэн жил албан ёсны айлчлал хийгээгүй. Тиймээс энэ удаагийн айлчлалд ач холбогдол өгч эдийн засаг, бизнесийн чиглэлээр хоёр улсын хамтын ажиллагааг өргөжүүлэхэд анхаарал тавьж байна. Монгол Улс Ази тив дэх стратегийн түншлэлийн хэмжээнд Япон, Солонгос, Энэтхэг улстай хамарч ажиллах болсон. Харин Европ тивд стратегийн түвшинд харилцаж буй улс одоогоор алга. Герман улстай энэ түвшинд хамтарч ажилладаг болохын тулд бүх чиглэлээр ажлын уулзалт, яриа хэлэлцээр явуулж байна.
-Монгол, Герман улсууд эдийн засаг болоод газар зүйн хувьд хамтарч ажиллах боломж хэр вэ?
-Өнөөдрийн уулзалтууд дээр яг энэ асуудлыг ярилцсан. Газар зүйн хувьд хоёр улс нэлээд зайтай. Монголд үйлдвэрлэсэн бараа бүтээгдэхүүнийг хэрхэн энд авчрах боломжтой вэ гэдэг талаас нь. Нэн ялангуяа уул уурхайн бүтээгдэхүүнийг тухайд гэхэд зөвхөн хүдрийг нааш нь зөөх боломжгүй. Тэгэхээр германы талаас бэлэн бүтээгдэхүүн болгоод оруулж ирэх боломжтой талаар ярилцсан. Та бүхэн мэдэж байгаа Ерөнхий сайд 2023 оны төсвийг өргөн барихдаа боловсруулах түвшнээ нэг шатаар ахиулах зорилт тавьснаа мэдэгдсэн. Энэ хүрээнд дэлхийд тэргүүлж буй улс орнуудтай хамтарч ажиллаж тэдний туршлага, хөрөнгө оруулалтыг татах чиглэлд идэвхтэй ажиллана.
