“Чингис хаан” хаад, язгууртны музей маргааш буюу 2022 оны 10 дугаар сарын 11-ний өдөр нээлтээ хийх гэж байна.

Үүнтэй холбогдуулан Ерөнхийлөгчийн Тамгын газрын дарга Я.Содбаатар, Соёлын дэд сайд М.Батбаяр, музейн захирал, академич С.Чулуун нар олон нийтэд мэдээлэл өглөө.

МУЗЕЙД:

• Монголын эртний төрт улс (Хүннү, Сяньби, Жужан);

• Эртний нүүдэлчдийн төрт улс (Түрэг, Уйгур, Хятан);

• Их Монгол Улс;

• Монголын Их эзэнт улс;

• Чингис хааны угсааны хаад, язгууртны (XIV-XX зууны эхэн үе);

• Дэлхий дахин ба Монголчуудын танхим (Монгол бахархлын танхим);

• Их хааны хүндэтгэлийн өргөө гэсэн байнгын үзмэрийг нийтэд толилуулах юм.

Энэ үеэр Я.Содбаатар “Олон улсын стандартад нийцсэн ийм музейтэй болсон нь монголчуудын түүх, соёлоо сурталчлах, аялал жуулчлалыг хөгжүүлэх, олон түмнийг соён гэгээрүүлэх зэрэг чиглэлээр хийж байгаа олон ажлын нэг” гэдгийг онцлов.

“Чингис хаан” хаад, язгууртны музей 12 мянга орчим үзмэртэй бөгөөд 92 хувь нь эх үзмэр, үлдэх хувь нь гадаадын улс орны музей, номын сан, архивт байгаа зарим эд өлгийн зүйлсийн  хуулбар бүтээл юм.

Музейн захирал, академич С.Чулуун “Энэ музей Хүннүгийн эзэнт гүрний үеэс XX зууны эх буюу 2,000 жилийн хугацаан дахь хаад, язгууртан, нүүдэлчдийн түүхийг цогцоор нь харуулсан төрт ёсны музей” гэдгийг тодотгов.

“Чингис хаан” хаад, язгууртны музей 2022 оны 10 дугаар сарын 12-ны өдрөөс иргэдэд үйлчилж эхэлнэ. Мөн 16 хүртэл насны хүүхэд, өндөр настан, хөгжлийн бэрхшээлтэй иргэдэд үнэ төлбөргүй, насанд хүрэгчдэд 30 мянга, оюутанд 15 мянга, гэр бүлд 20 мянган төгрөгөөр үйлчлэх юм байна.

Монгол Улсын Засгийн газрын 2019 оны 07 дугаар сарын 03-ны өдрийн хуралдаанаас “Чингис хаан” музейг байгуулахаар шийдвэрлэсэн бөгөөд Байгалийн түүхийн музейн буурин дээр байгуулж буй нь энэ юм.