"Гадаад улсаас эх орондоо эргэж ирсэн иргэдийг тусгаарлах байранд ажиглах хугацааг 21 хоногоор, гэртээ тусгаарлан ажиглах хугацааг 14 хоногооор, нийт 35 хоног тусгаарлахаар тогтоосон шийдвэр"-ийг хууль бус болохыг тогтоолгох, түүний улмаас иргэнд учирсан хохирлыг барагдуулах шаардлага бүхий хэргийг хянан шийдвэрлэх шүүх хурал Улсын Дээд шүүхийн Захиргааны хэргийн танхимд өнөөдөр болж байна.
Иргэн Б-ийн нэхэмжлэлтэй Улсын Онцгой Комисст холбогдох энэхүү хэргийн хариуцагчийн итгэмжлэгдсэн төлөөлөгч Д.Баярболд "Хэрэг хянан шийдвэрлэх ажиллагаанд өмгөөлөгчтэй оролцох боломжийг хангаж, хуралдааныг хойшлуулж өгнө үү" гэсэн хүсэлт гаргасныг өнгөрсөн сарын 28-ны өдрийн хуралдаанаар шүүх бүрэлдэхүүн хүлээн авч, шүүх хуралдааныг 2022 оны аравдугаар сарын 10-ны өдрийг хүртэл хойшйлуулсан байсан юм.
Дашрамд, 21 хоног тусгаарлах байранд байх хугацаанд нэг иргэн 1,075,000 төгрөг төлсөн. УОК-ын 15 удаагийн шийдвэрээр тусгаарлан ажиглах хоногийг 3, 7, 10 гэх мэт харилцан адилгүй байдлаар тогтоосон байдаг. Энэ хугацаанд иргэдийн тусгаарлалтын байранд төлж байсан мөнгө нь харилцан адилгүй юм. УОК-оос гаргасан шийдвэр хүчин төгөлдөр бус, хуульд нийцээгүй гэдэг нь тогтоогдвол тусгаарлагдаж байсан иргэд маргах боломжтой болох аж.
