Байгалийн түүхийн музейн буурин дээр баригдсан "Чингис хаан" музей 2022 оны Аравдугаар сарын 11-ний мягмар гаригт нээгдэх гэж байна.
Тус музейд түүх, соёлын 10,400 орчим дурсгалыг дэлгэж байгаагаас найман хувь нь хосгүй үнэт дурсгал байх аж.
"Чингис хаан" музей байгуулагдаж буй нь таван үндсэн ач холбогдолтой гэнэ.
Энэ талаар музейн захирал С.Чулуун МҮОНРТ-д өгсөн ярилцлагадаа
- Монголын төрт ёсны түүхийг цогцоор нь харуулах;
- Соёлын өвийг стандарт, аюулгүйн шаардлага хангасан нөхцөлд хадгалах;
- Бүх насны монголчууд төдийгүй монгол туургатан, бүс нутаг дэлхий дахины хүмүүсийг татах, тэдэнд Монголын түүхийн үнэн зөв мэдээлэл өгөх;
- Эдийн засгийн хувьд соёлын аялал жуулчлалыг хөгжүүлэх бүрэн бололцоотой болж буй;
- Монголчууд өөрсдөө том бүтээн байгуулалт хийж чаддагийг харуулсан жишээ болж байгаа юм" хэмээн онцолсон юм.
Хамгийн сүүлд музейн барилгын нүүрэн дээр Чингис, Өгэдэй, Гүюг, Мөнх, Аригбөх нарын таван их хааны тамгыг байршуулсан. Энэхүү таван их хааны тамга тус бүрийн дээд талд эртний төрт улсуудын сүлд шүтээн шонхор, галт шувуу зэргийг дүрсэлсэн бол тамганы доод талд тухайн хааны үед хэрэглэж байсан зоосон мөнгийг урласан юм.
Дашрамд, музейн тайлбарыг QR уншуулаад таван хэл дээр сонсох боломжтой аж.
