НӨАТ-ын сугалааны шинэ сурталчилгаа иргэдийг ялгаварлан гадуурхах, доромж өнгө аястай цацагдаж олон нийтийг бухимдуулаад амжсан. Мөн Сангийн яам энэхүү сурталчилгааг өөрийн цахим хуудсаар цацсан байсан ч иргэдийн шүүмжлэлээс бултаж устгасан билээ. 

Энэ талаар Сангийн сайд Б.Жавхлан дараах тайлбарыг өглөө. 

Тэрээр "Төсвийн талаар сэтгүүлчидтэй уулзах үеэр ийм асуудал гарсан. Би үзээд даруй зогсоосон. Сүүлийн хэд хоног төсвөө бариад, үүн дээр ажиллаж, шинэ сайд нартай тулж, өдөр бүхэн ажиллаж байна. Бараг нойр, хоолгүй яваад байгаа. Энэ хооронд иймэрхүү юм боллоо.

Татварын Ерөнхий Газрын дарга ч эрүүл мэндийн асуудлаас болж, гадаадад эмчлүүлж байгаа. Энэ хооронд анхаарал сарниж, ийм зүйл болсон байна. Уг нь удахгүй эхлэх сугалаагаа сурталчлах төлөвлөгөөт ажил байсан. Манай залуус үүнийг зохион байгуулсан. Би үзсэн, алдаатай зүйлүүд орсон, ёс зүйгүй үг хэллэг багтсан байна. 

Уг санаа нь их энгийн. Тавдугаар сард сугалаа зогсоосноор баримт бүртгүүлэлт хоёр дахин буурсан. Долоон жилд хүрсэн үр дүн гурван сарын хугацаанд 50 хувь буурсан. Цаашлаад НӨАТ-ын орлого буурах асуудал үүснэ.

Мөн хамтарч ажилласан студийн найруулга, зохиол санаанд хүрээгүй. Гүйцэтгэл амжилтгүй болсон учраас төлбөрийн асуудал гэж байхгүй" гэлээ.