"Гадаад улсаас эх орондоо эргэж ирсэн иргэдийг тусгаарлах байранд ажиглах хугацааг 21 хоногоор, гэртээ тусгаарлан ажиглах хугацааг 14 хоногооор, нийт 35 хоног тусгаарлахаар тогтоосон шийдвэр"-ийг хууль бус болохыг тогтоолгох, түүний улмаас иргэнд учирсан хохирлыг барагдуулах шаардлага бүхий хэргийг хянан шийдвэрлэх шүүх хурал есдүгээр сарын 28-ны өдөр боллоо. 

Иргэн Б-ийн нэхэмжлэлтэй Улсын Онцгой Комисст холбогдох энэхүү хэргийн хариуцагчийн итгэмжлэгдсэн төлөөлөгч Д.Баярболд "Хэрэг хянан шийдвэрлэх ажиллагаанд өмгөөлөгчтэй оролцох боломжийг хангаж, хуралдааныг хойшлуулж өгнө үү" гэсэн хүсэлт гаргасныг шүүх бүрэлдэхүүн хүлээн авч, шүүх хуралдааныг 2022 оны аравдугаар сарын 10-ны өдрийг хүртэл хойшйлууллаа.

Шүүхийн шийдвэрийн талаар нэмэмжлэгч талын өмгөөлөгч Б.Наранцэцэг "Хариуцагч УОК-ын төлөөлөгч өмгөөлөгч авах, мөн хоёр итгэмжлэгдсэн төлөөлөгч нь шүүх хуралд орох боломжгүй гэдэг үндэслэлээр хурлыг хойшлуулах хүсэлт гаргасан байна. Шүүхээс өмгөөлөгч авах хүсэлтийг нь нэг удаа хангахаар хүлээж авлаа" гэв. 

Мөн тэрээр, давж заалдах шатны шүүхээс 2022 оны тавдугаар сарын 3-ны өдөр гаргасан шийдвэрээс хойш дөрвөн сар өнгөрсөн байхад хариуцагч тал өмгөөлөгч яагаад аваагүй байгаа талаар байр суурийг нь асуухад "Шүүхээс өмгөөлөгч авах эрх байдаг тул энэ эрхийг нэг удаа олгоё гэж үзэж байх шиг байна. Нийслэлийн Захиргааны хэргийн давж заалдах шатны шүүх дүгнэлтээ "өмгөөлөгч авах эрх нь нээлттэй байхад авалгүй өдийг хүрсэн" гэдэг үндэслэлээр хангаж байгаагүй. Харин Дээд шүүх энэ хүсэлтийг хангаж шийдвэрлэлээ" гэлээ.

Дашрамд, 21 хоног тусгаарлах байранд байх хугацаанд нэг иргэн 1,075,000 төгрөг төлсөн. УОК-ын 15 удаагийн шийдвэрээр тусгаарлан ажиглах хоногийг 3, 7, 10 гэх мэт харилцан адилгүй байдлаар тогтоосон байдаг. Энэ хугацаанд иргэдийн тусгаарлалтын байранд төлж байсан мөнгө нь харилцан адилгүй юм. УОК-оос гаргасан шийдвэр хүчин төгөлдөр бус, хуульд нийцээгүй гэдэг нь тогтоогдвол тусгаарлагдаж байсан иргэд маргах боломжтой болох аж.