Баянгол дүүргээс сурагчдын сурлагын амжилт чанарыг ахиулах, элсэлтийн ерөнхий шалгалтын бэлтгэлийг эрчимжүүлэх, сургууль багш нарын харилцан суралцах, туршлагаа хуваалцах, хамтарч ажиллах арга замыг тодорхойлж, элсэлтийн ерөнхий шалгалтын чанарт ахиц гаргах зорилгоор “Элсэлтийн ерөнхий шалгалт-2022” болзолт уралдааныг 2022.03.01-2022.10.01-ний хооронд зохион байгуулж байна.

Тус болзолт уралдаанд сургуулиуд сургалтын менежерээр ахлуулсан ажлын хэсэг байгуулж, төлөвлөгөө гарган элсэлтийн ерөнхий шалгалтын хэмжээст дүн шинжилгээ хийж, бүтээлч санаачлагатай ажиллах, үр дүн тооцох, хүнд хичээлийн даалгаврын агуулгаар давтлага өгөх зэрэг ажлыг зохион байгуулахаас гадна дүүргийн хэмжээний нэгдсэн “Цахим анги” нийт 10 судлагдахуун тус бүрээр хоёр дахь жилдээ хичээллэж байна.

2021 онд Баянгол дүүргээс “Баянгол-Цахим сургууль” төсөл арга хэмжээний хүрээнд “Элсэлтийн ерөнхий шалгалт-2021” болзолт уралдааныг зарлаж төрийн болон төрийн бус өмчийн 2400 сурагч 73 дижитал ангид хуваагдан хичээллэсний үр дүнд ЭЕШ-ын дундаж  537.3 оноогоор Нийслэлд 2-р байрт эрэмбэлэгдсэн ба өнгөрсөн жилээс амжилтаа 21,7 оноогоор ахиулж, нийт 13 сурагч 800 оноо авсан амжилт үзүүлсэн билээ. 

Тэгвэл 2022 онд дүүргийн хэмжээнд нийт 2436 сурагч 12 дугаар анги төгсөх ба өмнөх оны амжилтаа ахиулах зорилгоор элсэлтийн ерөнхий шалгалтад бэлтгэх цахим ангийг 10 судлагдахуун тус бүрээр хичээллүүлж, сургалтыг дүүргийн тэргүүлэх зэрэгтэй, үндэсний сургагч 79 багш, 18 сургалтын менежер зэрэг бүрэлдэхүүнтэй мэргэжлийн зөвлөлдөх баг ажиллаж байна.

Ташрамд дурдахад, “Элсэлтийн ерөнхий шалгалт-2022” болзолт уралдааны шагналын сан нийт 35,500,000 төгрөг бөгөөд шалгалтад 800 оноо авсан сурагч бүрийг 1,000,000 төгрөгөөр,  судлагдахуун тус бүрд хамгийн өндөр чанарын үзүүлэлттэй 800 оноо авсан төрийн өмчийн сургуулийн төгсөгчийг бэлтгэсэн багшийг тус бүр 1,000,000 төгрөгөөр шагнаж урамшуулах юм.