Нийслэлийн ИТХ-ын өнгөрсөн долоо хоногийн ээлжит хуралдаанаар нийтийн тээврийн автобусанд бэлэн мөнгөөр үйлчилдэг болох тухай тогтоолыг баталжээ.
Тодруулбал, тус тогтоолын дагуу нийтийн тээврийн автобуснуудад бэлэн мөнгөний хайрцгийг байрлуулах аж. Ингэснээр иргэд бэлэн мөнгөөр болон U-Money картаараа төлбөрөө төлөх боломжтой болох юм. Хуучин шиг мөнгө хураагч буюу бидний хэлж заншсанаар кондуктор эгч нар ажиллахгүй юм байна.
Зөвхөн лацадсан бэлэн мөнгөний хайрцаг тавих аж.
Мөн Нийслэлийн Засаг даргын захирамж гарсны дараа дээрх тогтоол хэрэгжинэ.
Улаанбаатар хотод өнөөдрийн байдлаар 106 чиглэлд 900 гаруй автобус иргэдэд үйлчилдэг бөгөөд тэдгээрт бүгдэд нь бэлэн мөнгөний хайрцагтай тавина.
Дашрамд, 2015 онд нийтийн тээврийн үйлчилгээний цахим төлбөрийн төсөл хэрэгжих үед автобуснуудад тавьсан байсан бэлэн мөнгөний лацтай хайрцгуудыг авсан юм. Эдгээрийг буцааж ашиглах ба 1,200 гаруй хайрцаг бэлэн байгаа аж. Мөн үүнд зориулж төсвийн мөнгөнөөс хэрэглэхгүй гэдгийг албаны хүн тодотгов.
