Олон нийтийн сүлжээнд "Монгол Улсын Батлан хамгаалахын яам ОХУ-ын Луганск, Донецкийн бүгд найрамдах улсад явуулж буй тусгай ажиллагаанд оролцох сайн дурын цэрэг татаж эхэллээ" гэх зарын чанартай мэдээлэл тархаж байна. Тэгвэл уг мэдээлэл нь "худал" болохыг Батлан хамгаалахын яамнаас албан ёсоор мэдээллээ.
Энэ талаар Батлан хамгаалах яамны Ерөнхий хянан шалгагч, бригадын генерал Ж.Болдбаатар “2022 оны Есдүгээр сарын 15-ны өдөр сошиал орчинд Монгол Улсын Батлан хамгаалах яам, ОХУ-ын Батлан хамгаалах яамны логог ашиглан сайн дурын цэрэг татлага явуулж байна гэдэг хуурамч мэдээлэл гаргаж эхэлсэн. Энэ мэдээлэл бол хуурамч. Үүнийг гарсны дараа бид тодорхой байгууллагуудтай харилцаж мэдээлэл авч байгаа. ОХУ-ын Элчин сайдын яамны Цэргийн аттещегаас тодруулахад “Энэ бол ор үндэсгүй мэдээлэл” гэдэг хариулт өгсөн.
Энэ хуурамч мэдээлэл Монгол Улсын Үндэсний Аюулгүй байдалтай холбоотой. Монгол улсын Засгийн газрын үйл ажиллагааг харлуулах, язгуур эрх ашигт нөлөөлөхүйц тул бид хууль, хяналтын байгууллага руу хандаж, хуурамч мэдээлэл тараасан хүмүүсийг олуулна. Үүний эзэн холбогдогчийг тагнуулын байгууллага тогтооно. Ярих ярихгүй гэж юм байдаг. Энэ бол санаатай үйлдэл. Бас юм мэддэг хүн дээрх мэдээллийг цацсан нь ойлгомжтой" гэлээ.