Эрүүл мэндийн яамнаас энэ сард халдварын тархалт оргилдоо хүрэх эрсдэлтэй байгаа талаар мэдээлж, халдвар хамгааллын дэглэмийг сайтар баримтлахыг анхааруулаад байгаа. Тэгвэл ДЭМБ-аас энэ талаар дахин анхааруулга хийж, мэдэгдэл гаргажээ. Омикроны шинэ хувилбар Энэтхэг зэрэг улсад гарч, тархах чадвар нь нэмэгдэж байгаа учраас халдвар хамгааллын дэглэмийг сайтар сахихыг сануулж байна.
Эрүүл мэндийн сайдын зөвлөх О.Батбаяр:
-"Монгол Улсын хувьд долдугаар сарын сүүл наймдугаар сарын эхэн үеэр эрчимтэй давамгайлсан Омикрон хувилбарын давалгаа оргилдоо хүрээд шувтрах шатандаа орсон. Үргэлжлүүлэн шинэ хувилбар орж ирнэ гэж бид өмнө мэдээлж байсан. ДЭМБ мэдээлснээр Энэтхэгт шинээр бүртгэгдсэн BA2.75 хувилбар эрчимтэй давамгайлах төлөвтэй байгааг олон улсын эрдэмтэд анхааруулж байна. Шинэ хувилбар нь BA5 хувилбараас халдварлах чадвар нэмэгдсэн, шинж тэмдэгийн хувьд хүндрэх эрсдэлтэй.
Энэ шинэ хувилбар нь манай улсад есдүгээр сарын сүүлчээр буюу хүйтэн улирал эхлэхэд бүртгэгдэх болов уу гэсэн таамагтай байна. Бидний авах арга хэмжээ 12-оос доош насны хүүхдүүд болон 60-аас дээш насны хүмүүсийг вакцины нэмэлт тундаа хамрагдах шаардлагатай гэж зөвлөж байна.
Өнөөдрийн нөхцөл байдлаар томуугийн түвшинд идэвхжсэн шатандаа байгаа. Тэгэхээр яг одоогийн хэмжээгээр тулгамдсан асуудал болоогүй байгаа ч хүйтний улирал нэмэгдэхэд тохиолдлын тоо нэмэгдэнэ. Гол санаа зовоож байгаа болох томуугийн хүрээнд багтах вирусын давалгаа үүсэх магадлалтай. Энэ нь харьцангуй нас баралтын тоо өндөр байдаг" гэв.
