Түгжрэл нэгэнт хамгийн муу үр дүндээ хүрч, тэг зогсолт хийх эрсдэлтэй болсон гэхэд болно. Хичээлийн шинэ жил эхэлж буйтай холбоотойгоор найм хоногийн турш авто машинуудыг улсын дугаарын тэгш, сондгойгоор нь ээлжлэн хөдөлгөөнд оролцуулж, хязгаарлах шийдвэрийг гаргаж, энэ өдрүүдэд үргэлжилж байна. Энэхүү зохицуулалт Есдүгээр сарын 4-нөөс эхлэн цуцлагдах ба ням гаригт дугаарын хязгаарлалт үйлчлэхгүй.

Тэгвэл энэхүү шийдвэрийг цаашид үргэлжлүүлэх сонирхолтой байгаа гэдгээ Хотын дарга Д.Сумъяабазар хэллээ. Энэ асуудлыг энэ сарын 7-нд болох НИТХ-аар оруулахаар бэлтгэж эхэлсэн байна. 

Ирэх долоо хоногоос хуучин горимдоо буюу тээврийн хэрэгслийн улсын дугаарын төгсгөлийн оронгоор хөдөлгөөнд оролцуулдаг зохицуулалт үйлчилнэ.

Замын хөдөлгөөний удирдлагын төвийн ажилтан Н.Намуу "Бүртгэлээс харахад энэ жилийн улсын дугаарын тэгш, сондгойг хязгаарлалтын үед хөдөлгөөний эрчим өмнөх жилээс 16 хувиар буурч, энэ ажил үр дүнтэй үргэлжилж байна. Иргэд, жолооч нар үүрэг хариуцлагаа ухамсарлан хөдөлгөөнд оролцож байна. Тэгш, сондгойгоор хязгаарлаж буй зохицуулалт есдүгээр сарын 3-ны Бямба гарагийг дуустал үргэлжилнэ" гэж байв.

Иргэд олон нийттэй харилцах 11-11 төвд хандсан иргэдийн 70 хувь нь тэгш, сондгой хязгаарлалтыг дэмжсэн мэдээлэл байна.