Цэвэрлэх байгууламж барих ажлын санхүүжилтын талаар иргэн О.Энхмаа Улсын Ерөнхий Прокурорын Газрын гадна талбайд мэдэгдэл хийж, шаардлага хүргүүлэв.

Тэрээр "Цэвэрлэх байгууламжийг ашиглалтад оруулах зорилгоор нэг их наядын санхүүжилтийг БНХАУ-аас авч байсан. Энэ ажил хэдэн хувийн биелэлттэй байгааг шалгуулахаар 2020 оны есдүгээр сарын 24-нд АТГ-т гомдол гаргасан. Улмаар хэрэг бүртгэлийн хэрэг үүсгэсэн ч Нийслэлийн Прокурорын Ерөнхий газраас хэргийг хаасан байдаг. Ард иргэд эрүүл аюулгүй орчинд амьдрах, эрүүл мэндээ хамгаалуулах эрхтэй. Гэвч өнөөдөр Улаанбаатар хотын дөрвөн зүг, найман зовхист цэвэрлэх байгууламжийн өмхий, лаг үнэртсээр байгаа. Эмч хүний хувьд хэлэхэд, энэ нь ард түмний эрүүл мэндэд ноцтой хохирол учруулж, цаашилбал өвчин эмгэгийн гол үндэс болж байгааг үгүйсгэхгүй. 

Одоогоор үнэр эрүүл мэндэд хэрхэн сөргөөр нөлөөлдгийг хараахан нотлон тогтоохгүй байгаа учраас ард иргэд төдийлөн ойлгож мэдэхгүй байна. Цэвэрлэх байгууламж, нефть боловсруулах үйлдвэр барих ажлын хүрээнд Засгийн газарт удаа дараа шаардлага хүргүүлж, ажил хэрэг болгохоо мэдэгдэж байна" гэлээ.