Засгийн газрын ээлжит хуралдаан болж, аялал жуулчлалын салбарт хэрэгжүүлж байгаа төсөл хөтөлбөрийн талаар мэдээлэл сонссон байна.
Энэ талаар БОАЖ-ын сайд Б.Бат-Эрдэнэ "Ойн агентлаг байгуулах байгуулах асуудлыг УИХ-аар оруулж зургадугаар сарын 3-ны өдөр албан ёсоор байгуулсан. Өнөөдөр Засгийн газрын 36-р хуралдаанаар тус тогтоолыг батлууллаа. Ингэснээр өнгөрсөн зургаан сарын хугацаанд саатаад байсан ойн агентлагтай холбоотой төсвүүд хөдөлж эхэлнэ. Ойн судалгаа хийсэн 12 албан хаагч төсвийн асуудлаас үүдэж цалингүй ажилласан. Тэдгээр хүмүүст цалинг нь олгоно.
Засгийн газраас 2023-2024 оныг “Монгол Улсад зочлох жил” болгож зарласан. Үүнтэй холбогдуулан нэг сая хүртэлх жуулчин авахад уг ажил томоохон дэмжлэг болох юм. Тиймээс 2024 оныг аялал жуулчлалын жил болгохтой холбогдуулан цахим платформуудыг албан ёсоор өнөөдөр олон улсад танилцуулж байна. Ингэснээр гадаад дахь төлөөллүүдэд, цахим виз авсан жуулчин бүрт Монгол Улсын Ерөнхий сайдын “Монгол Улсад тавтай морилно уу” мэндчилгээ хүргүүлнэ. Өнөөдрийг хүртэл Монгол Улсад 73 мянган жуулчин ирж, 70 сая долларын орлого оруулсан байна. Өнгөрсөн цаг хугацаанд Монгол Улс аялал жуулчлалын стратегигүй явж ирсэн. Тиймээс Монгол Улсын мэдээллийг гаднын жуулчид хайж олоход хүндрэлтэй байсан хэрэг.
Монгол Улсад аялах илэрц 2017 онд 118 сая, 2019 онд 165 сая илэрц гарч байжээ. Бид цахим платформтой болсноор албан ёсны, нэгдсэн мэдээлэл өгдөг болно. Тус платформд томоохон зохион байгуулалттай эвент болон аялал жуулчлалын баазуудыг нэгтгэнэ. Манай улсад хамгийн их жуулчин ирдэг орнууд болох Англи, Хятад, Орос, Япон, Солонгос, Испани, Монгол хэл дээр үүнийгээ нээнэ. Энэ платформуудыг хийх ажил үргэлжилж байгаа. Мөн гар утас, цахим хуудсаар нэвтрэх QR байрлуулах юм. Монгол Улсад болох бүхий л арга хэмжээнүүдийн мэдээллийг оруулахаас гадна тасалбар худалдаалах сувгийг ч холбоно. Үүндээ дөрвөн сэтгүүлийн мэдээллийг хавсаргаж байна. Сэтгүүлийн мэдээллээ хоёр сар тутамд шинэчлээд явна. Халдварын мэдээлэл зэрэг шаардлагатай бүхий л мэдээллийг багцлан хүргэх зорилго тавин ажиллаж байна. Уг ажил гар утасны “VisitMongolia” аппаар гарч, бэлэн болсон. Үүний гол зорилгыг 2022 онд хамгийн багадаа 2019 онд ирсэн жуулчны 50 хувьд хүргэх юм" гэв.
