Цар тахлын улмаас хоёр жил цахимаар болсон Үндэсний Их баяр наадмын нээлт болох эсэх нь тодорхойгүй болжээ.

Энэ жил ардын хувьсгалын 101 жилийн ойг долдугаар сард тохиож буй.

Наадмын төсөвт 2.3 тэрбум төгрөгийг тусгаж, тохижилт үйлчилгээнд зарцуулахаар төлөвлөсөн байгаа. Тэгвэл энэ мөнгө одоо хүртэл шилжиж орж ирээгүй талаар УДЭТ-ын жүжигчин Г.Амгаланбаатар өөрийн цахим хуудсандаа бичсэн байна.

Тэрээр "Төр засгаас 100, 101 жил гээд л сүржигнээд байх юм. Энэ жилийн төрийн наадмын нээлт стадионд болох нь худлаа боллоо шүү. Ард түмэн минь их юм хүлээгээд хэрэггүй. Өнөөдөр зургаадугаар сарын 13 одоо болтол төрөөс шийдэгдсэн мөнгөнөөс ганц ширхэг хадаасны мөнгө ч орж ирээгүй байна. Ид шидтэн л биш бол амжихаа байлаа" гэжээ. 

Энэ удаагийн баяр наадмын нээлт, хаалтын үйл ажиллагааг УДЭТ-ын ерөнхий найруулагч Н.Наранбаатар найруулахаар сонгогдсон билээ. 

Харин энэ талаар Нийслэлийн Засаг Даргын Тамгын Газраас тодруулахад "Наадмын төсөл, хөтөлбөр эцэслэгдээгүй байгаа учир одоогоор ямар нэгэн мэдээлэл өгөх боломжгүй" гэдэг хариулт өглөө.