Өөрийн багын найз, бэлтгэл хангагч Улсын начин Э.Энхбатын амь насыг онц хэрцгийгээр хөнөөсөн Олимпын аварга Н.Түвшинбаярт шүүхээс 16 жилийн хорих ял оноосон билээ.

Өчигдөр гарсан шүүхийн шийдвэрийн талаар олон нийт “ял нь хөнгөдсөн, хүндэдсэн” гэх мэт өөр өөрийн байр суурийг нийгмийн сүлжээгээр илэрхийлсээр байна. Ямартай ч шүүхээс түүнийг “хүнийг онц хэрцгийгээр алсан” гэм буруутайд тооцсон явдал нь шударга зүйл болсон юм.

Тэгвэл шүүх хурлын шийдвэрийн талаар Э.Энхбат агсны эхнэр Б.Нандинцэцэг өөрийн сошиал хуудаснаа байр сууриа илэрхийлжээ. 

Тэрээр "Ам нээвэл уушги нээ гэдэг. Арай л хэрээс хэтэрсэн зүйлс болж байна.

Нэгд, шүүхээс өгсөн ялыг хүлээн зөвшөөрөхгүй байгаа гэж худал мэдээлэл тарааж байна. Надад огтоосоо тийм зүйл байхгүй. Ар гэрийнхэн, таван хүүхэдтэйгээ уулзаад нээлттэй хоригдоно л биз дээ. Өндөр настай аав ээж, эхнэр хүүхдийг нь бодолгүй яахав дээ.

Хоёрт, хүүхдийн төлбөр нэхлээ гээд бүр барьж идлээ. Намайг юу нэхэж яаж орсныг гурван шүүгч, хоёр талын өмгөөлөгч нар иргэдийн төлөөлөгч гээд тэнд байсан бүх хүн харсан, сонссон доо. Даргалагч шүүгч Х.Одбаяр гуай "Нандинцэцэг ээ, чиний бүх хохирол төлөгдсөн гээд зөвхөн бодит хохирол (өөрийг зүгээс гаргасан 423 сая төгрөг) төлөгдсөн гээд байх юм. Гурван хүүхдийн төлбөр энэ тэрээ нэхэмжилж ирээгүй юм уу, жилд төлбөр нь хэд байдаг вэ" гэхэд нь л би 70 сая орчим байдаг аа л гэсэн. Би өөрөө хувиараа бизнес хийдэг учраас ахуйн асуудлаа болгоод зохицуулаад явж байгаа гэж хэлсэн. Шүүгч "чи шүүх дээр аваад ирсэн бол чамд бид хангаж өгөх байлаа" гэсэн. Үүнийг бүгд сонссон. Даанч энэ бичлэг цацагдаагүй. Тэгээд намайг иргэний шүүхээр явж болно гэсэн. Мөн Л.Данзанноров өмгөөлөгч ч ойлгогдохоор хэлж л байна лээ шүү дээ.

Гуравт, оршуулгын зардал 85 сая төгрөгийн баримтыг би эх хувиар нь өгсөн. 300-400 хүний зэд цагаалга энэ зэргийн байлгүй яахав дээ. Ханийг минь хүртэл нэг муу начны ажил явдал 85 сая, алтаар хучаа юу гэж ирээд л бичих юм. Эрүүл хүнээс ийм муухай үг гарахгүйг мэдэж байгаа ч үнэхээр муухай юм.

Дөрөвт, би тэр айлын өгье гэсэн хоёр үл хөдлөхийг голж шилээгүй. Манай өмгөөлөгч өөрийн зүгээс тийм зүйл надад хэлээгүй ярьсан. Тэр айлаас би тийм юм өг, хэдэн төгрөг өг гэж нэхсэн удаа байхгүй. Ар гэрийнхэн нь болон Түвшинбаяр ч мэдэж байгаа. Өөрийн гэсэн эрүүл тархи, сэтгэл зүрхтэй хүн бүр миний өмнөөс бухимдаж байгаа байх. Хоёр талын өмгөөлөгч нар маш ойлгогдохоор яриад байхад л учир зүггүй муулаастай. Намайг шуналтай хүүхэн гэлээ гээд би тийм болчихгүй л дээ. Эцэст нь хохирогч л буруутан болдог хорвоо юм байна. Миний уг хүнийг мэддэг хайртай хүмүүс минь байхад болно доо" гэжээ.