Зайсангийн амны амралт зугаалгын бүс рүү нэвтрэх ганц гарцыг хаасан зөрчлийг өчигдөр арилгуулсан талаар нийслэлийн Засаг даргын ахлах зөвлөх өнөөдөр мэдэгдэхдээ бүх үйл ажиллагаа хуулийн дагуу явагдсан гэв.
Гэвч энэ үеэр ажил үүргээ гүйцэтгэж явсан сэтгүүлчийн биед цагдаагийн алба хаагч халдаж буй нь бичлэг цахим сүлжээгээр тараад буй.
Үүнтэй холбогдуулан Монголын Сэтгүүлчдийн нэгдсэн эвлэл болон сэтгүүлчид хамтран мэдээлэл хийлээ.
Энэ үеэр МСНЭ-ийн Ерөнхийлөгчийн үүргийг түр орлон гүйцэтгэгч З.Боргилмаа "Сэтгүүлчийн мэргэжлийн хууль ёсны үйл ажиллагаанд цагдаагийн алба хаагчид биед нь хүчээр халдаж, баримтыг устгаж байгаа энэ явдал бол анхны тохиолдол биш. Жилийн өмнө яг энэ асуудлаар цагдаагийн алба хаагч мэргэжлийн үйл ажиллагааг таслан зогсоож биед нь халдсан асуудлаар бид ЦЕГ, Хууль зүй, дотоод хэргийн сайд Х.Нямбаатарт хандаж байсан.
Өчигдрийн тухайд сэтгүүлчийг сурвалжилга хийж байсан газраас хүч хэрэглэж холдуулаад мэдээлэл дамжуулж байсан төхөөрөмжийг таслан зогсоогоод бүх хэрэгслийг хурааж авсан. Оператор мөн байгаа. Гар утсыг аваад удаан хугацаагаар аваад үзэгчдэд хүргэж байсан, цацагдсан мэдээллийг устгасан байна.
Хэвлэл мэдээллийн эрх чөлөөний тухай хуулиар сэтгүүлчийн нийтэлж нэвтрүүлж байгаа мэдээллийн агуулгад хяналт тавихыг хориглосон байдаг. Дамжуулсан мэдээллийг устгана гэдэг сэтгүүл зүйн агуулгад хүчний байгууллагад халдсан хэрэг. Хэвлэлийн эрх чөлөөг хамгаалах Эрүүгийн хуулийн заалт байдаг. Өөрийн болон бусдын ашиг сонирхлыг хөндсөн мэдээллийг тараалгахгүй байхын тулд хүч хэрэглэхээр завдах нь эрүүгийн гэмт хэрэг юм гэж хуульд заасан байна. Энэ хоёр хуулийг зөрчиж дур зоргоор ийм үйлдэл хийсэн байна.
Хэвлэн нийтлэх эрх чөлөө гэдэг Үндсэн хуулиар тунхаглагдсан эрх чөлөө байдаг. Үүнийг хэв журам сахиулах үүрэгтэй цагдаагийн алба хаагчид дур зоргоороо хөндөж, халдаж болдоггүй юм. Энэ нь хэвлэл мэдээлэл, цаашлаад иргэд төрийн хооронд маш том зөрчлийг үүсгээд байна. Нэг биш удаагийн үйл явдал учраас Цагдаагийн Ерөнхий газрын удирдлагууд дүгнэлт хийх болсон. Бодитой хариу өгөхийг шаардаж байна" гэлээ.
