Зайсангийн амны амралт зугаалгын бүс рүү нэвтрэх ганц гарцыг хаасан зөрчлийг өчигдөр арилгуулсан талаар нийслэлийн Засаг даргын ахлах зөвлөх өнөөдөр мэдэгдэхдээ бүх үйл ажиллагаа хуулийн дагуу явагдсан гэв.

Гэвч энэ үеэр ажил үүргээ гүйцэтгэж явсан сэтгүүлчийн биед цагдаагийн алба хаагч халдаж буй нь бичлэг цахим сүлжээгээр тараад буй. 

Үүнтэй холбогдуулан Монголын Сэтгүүлчдийн нэгдсэн эвлэлээс мэдээлэл хийлээ.

Цагдаагийн халдлагад өртсөн Сэтгүүлч Г.Гэрэлмаа "Өчигдөр шөнө цагдаад бүх зүйлээ хураалгаад, хэнтэй ч холбоо барих боломжгүй болгосон. Ингээд намайг маш олон цагдаа нар Зайсан орчмоос баривчлаад, цагдаагийн хэлтэст авч ирсэн. Намайг ажлаа хийж явтал камерыг минь булаан авсан, гар утсыг маань олон цагдаа нар бие биедээ дамжуулаад буцааж өгөхгүй байсаар, доторх бүх баримт материалыг устгасан. Хүнгүй газарт миний биед 10 гаруй удаа цагдаа нар халдсан. Миний амыг гараараа тагласан. Чи чаддаг юм бол хашхир, уйл. Хэн ч чамайг сонсохгүй гээд цагдаа нар басамжилсан. Миний толгой дээр гишгэсэн. Намайг ямар үндэслэлээр ийм байдалд оруулсныг ойлгоогүй. Цагдаагийн албан хаагчид намайг ингэж хүнд байдалд оруулсанд маш гомдолтой байна. Надаас тайлбар, мэдүүлэг огт авахгүй байсаар шөнө сулласан. "Шоронд нь хатаачихмаар, жүжигчин сэтгүүлчид их олон юм аа" гэж доромжилсон. Намайг саатуулсан цагдаа Хан-Уул дүүргийн цагдаагийн нэгдүгээр хэлтсийнх. Бас чи байцаалт өгч яах гэж байгаа юм гэсэн. Намайг согтуу гэж баривчилсан. Үлээлгэсэн. Тэг хувьтай гарсан. Надад баримт зураг нь байгаа.

Цагдаа хэвлэн нийтлэх эрхэнд шууд халдаж байна гэж би үзэж байна. Камерын өмнө шударга байдаг цагдаа нар камер унтрахаар яагаад ийм "харгис" болчихдогыг би гайхаж байна" гэлээ.