Голуудын усны түвшин үерийн түвшнийг даван үерлэж байгааг Цаг уурын байгууллагаас мэдээллээ.
Уг мэдээллээр өнөөдөр буюу зургаадугаар 9-ний өдрийн байдлаар
- Сэлэнгэ мөрний дунд хэсгээр, Хөвсгөлийн уулсаас эхтэй Зэлтэр, Хэнтий нурууны зүүн хажуугаас усжих Онон, Эг, баруун хажуугаас усжих Тэрэлж зэрэг голуудын усны түвшин өмнөх өдрийнхөөс 10-50 см нэмэгдэж,
- Хэнтий нуруунаас эхтэй Онон, Алтайн нуруунаас эхтэй Ховд, Хөвсгөлийн уулсаас эхтэй Үүр, Увс нуурын савын Хархираа зэрэг голууд үерийн түвшнийг 5-30 см даван,
- Балж гол болон Онон гол Дадал сум орчмоор үерийн аюултай түвшнийг 5-10 см даван үерлэж байна.
Маргааш буюу 10-нд Ус судлалын Туул-Улаанбаатар харуул орчмоор усны түвшин 10 см орчим нэмэгдэх төлөвтэй байна.
Иймд дээр дурдсан голуудын сав дагуу суурьшиж, нутаглаж буй ард иргэдийг үерийн аюулаас болгоомжтой байхыг онцгойлон анхааруулж байна.
