Хүүхдийн эрхийг хамгаалахад шаардагдах бодит мэдлэг, чадвар, хандлагыг хүүхэд, багш, гэр бүл, нийгмийн бүлгүүдэд эзэмшүүлэх энгийн агуулга, арга зүйг нээн харуулсан уран сайхны тавилттай бүрэн хэмжээний  “Хөөрхөн өдөр” баримтат киноны нээлт өнөөдөр буюу Тавдугаар сарын 31-ний өдөр “Өргөө-1” кино театрт боллоо.  

“Тогтвортой хөгжлийн боловсрол-2” төслийн хүрээнд Нийслэлийн ерөнхий боловсролын 28 дугаар сургуулийн сурагчид өмнө нь “Хүүхэд хамгааллын түншлэлийг Хүүхдийн оролцооны аргаар бэхжүүлэх нь” төслийг санаачлан хэрэгжүүлж, хүүхдийн  эрх, хөгжил хамгааллын чиглэлээр 9 видео контент бүтээн олны хүртээл болгож байсан. Тэгвэл энэ удаад тус сургууль хүүхдүүдийнхээ хамтаар хүүхдийн эрхийн төлөө хүүхдүүд өөрсдийнхөө дуу хоолойг бүтээлээрээ дамжуулан илэрхийлж, хүүхдүүд юу хүсдэг, тэдэнд ямар боломж байгааг томчуудад ойлгуулахыг хичээн өөрсдөө зохиолоо хамтран бичиж, тоглосон 2 хэсгээс бүрдэх  бүхий “Хөөрхөн өдөр” баримтат киног бүтээсэн байна.

Энэхүү киноны нээлтэд “Тогтвортой хөгжлийн боловсрол-2” төслийн багийнхнаас гадна БГД-ийн Засаг дарга Ө.Сумъяабаатар, Засаг даргын үйл ажиллагааны хөтөлбөр, эдийн засаг нийгмийг хөгжүүлэх үндсэн чиглэл, гэмт хэргээс урьдчилан сэргийлэх асуудал хариуцсан төслийн удирдагч Д.Жаргалсүрэн, НХХ-ийн дарга С.Мөнхзаяа нар оролцсон юм.

Энэ үеэр дүүргийн Засаг дарга энэ киног бүтээсэн төслийн багийнхан, хамтран бүтээсэн байгууллага, мэргэжлийн багийнхан болон оролцон тоглосон багш сурагчдад  талархал илэрхийлээд “Энэ уран бүтээл “Ковид”-ын хоёр жилд Улаанбаатар болон хөдөө орон нутгийн хүүхдүүд ямар байсан мөн хүүхдүүдийн дотоод сэтгэлд байгаа нуугдмал ертөнц хийгээд томчуудад юу хэлэхийг хүсдэг болохыг харуулсан уран бүтээл болсон байна. Миний хувьд энэ киног олон хүн үзэж, хүүхдүүд эцэг эхчүүд биднээс юу хүсдэг вэ гэдгийг хараасай гэж хүсэж байна” гэсэн юм.

Дашрамд дурдахад, 2019-2022 оны хооронд 3 жилийн хугацаатай хэрэгжүүлж буй “Тогтвортой хөгжлийн боловсрол-II” төслийн хүрээнд Баянгол дүүргээс 3 сургууль сонгогдсон төсөл хэрэгжүүлж, төслийн сайн туршлага, үр дүнг түгээх, бусад сургуулиуддаа сурталчлах, харилцан суралцах зорилго бүхий “ТОГТВОРТОЙ ХӨГЖЛИЙН ТӨЛӨӨХ ЗАГВАР СУРГУУЛИУДЫН ХАМТЫН АЖИЛЛАГАА-САНААЧИЛГА” туршлага хуваалцах, харилцан суралцах өдөрлөгийг “Эрдмийн өргөө” цогцолбор сургууль дээр амжилттай зохион байгуулсан юм. Мөн “Тогтвортой хөгжлийн боловсрол-2” төслийн хүрээнд хүүхэд хамгааллын чиглэлээр хүүхдийн оролцоонд тулгуурлаж “Хүүхэд засагладаг сургууль”-ийн загварыг 28 дугаар сургууль бий болгоод байгаа юм.