НҮБ-аас Монгол Улсад 2023-2027 онд хэрэгжүүлэх “НҮБ-ын Тогтвортой хөгжлийн хамтын ажиллагааны хүрээ” буюу ирэх 5 жилийн үйл ажиллагааны стратегийн хөтөлбөрөө боловсруулж дууссан байна.

Уг хөтөлбөрт Гадаад харилцааны сайд Б.Батцэцэг, Сангийн сайд бөгөөд Эдийн засгийн хөгжлийн сайдын үүрэг гүйцэтгэгч Б.Жавхлан, Монгол Улс дахь НҮБ-ын Суурин төлөөлөгч Тапан Мишра  нар өнөөдөр гарын үсэг зурлаа.

Энэхүү хөтөлбөр нь ирэх таван жилд Монгол Улсыг гамшигт тэсвэртэй, тогтвортой хөгжил бүхий эрүүл, аюулгүй орчинтой, хүний эрхийг хангасан орон болж хөгжихөд чухал хувь нэмэр болно гэдэгт итгэлтэй байгаагаа Гадаад харилцааны сайд Б.Батцэцэг гарын үсэг зурах ёслолын үеэр онцлов.

Монгол Улс НҮБ-тай хөгжүүлж буй хамтын ажиллагаагаа таван жилээр төлөвлөдөг бөгөөд 2017 оноос хойш хэрэгжиж буй “Хөгжлийн тусламжийн хүрээ” баримт бичиг энэ онд хэрэгжиж дуусах юм. Уг баримт бичгийн үргэлжлэл болон өнөөдөр гарын үсэг зурсан дээрх хөтөлбөр Монгол Улсын “Алсын хараа-2050” урт хугацааны хөгжлийн бодлого, “Шинэ сэргэлтийн бодлого”-той нягт уялдаж буйг мөн дурдлаа. Ингэхдээ олон улсад үүсээд буй геополитикийн асуудлыг ч харгалзан үзсэн байна. Уг хөтөлбөрийг хэрэгжүүлэхэд НҮБ-ын системийн 23 байгууллага дэмжих бөгөөд энэ нь Монгол Улс тус байгууллагын итгэлтэй түнш гэдгийг харуулж буйг Гадаад харилцааны сайд цохон тэмдэглэсэн юм.

“НҮБ-ын Тогтвортой хөгжлийн хамтын ажиллагааны хүрээ” баримт бичгийг хэрэгжүүлэх хамтарсан ажлын төлөвлөгөө, санхүүжилтийн төлөвлөгөө, НҮБ-ын системийн байгууллагуудаас хэрэгжүүлэх хөтөлбөр боловсруулах ажлыг ойрын хугацаанд хийхээр төлөвлөж байгаа аж.

Энэхүү баримт бичгийн хүрээнд нийгэм, эдийн засаг, байгаль орны өмнө тулгамдаж, хөгжил дэвшлийн хурдыг сааруулж буй хүчин зүйлсийг тодорхойлж, ирэх таван жилд хүний хөгжил, ногоон хүртээмжтэй өсөлт, хүн төвтэй засаглал гэсэн үндсэн гурван чиглэлийн хүрээнд хамтран ажиллана гэдгийг Сангийн сайд бөгөөд Эдийн засгийн хөгжлийн сайдын үүрэг гүйцэтгэгч Б.Жавхлан дурдлаа. Тэрбээр, “Монгол Улсын хэмжээнд ядуурлыг бууруулах, хөгжлийн бодлогын нэгдсэн тогтолцоог бүрдүүлэх, боловсролын чанарыг ахиулах Тогтвортой хөгжлийн зорилгыг хэрэгжүүлэхэд ахиц гарч байгаа ч цар тахлын улмаас хүндрэл учраад байсан юм. Иймд нийгмийн эрүүл мэндийг хамгаалах, гамшгийн эрсдэлийн оновчтой удирдлагаар хангах ажлыг нарийвчлан тусгах, эдийн засгийн цахим, ногоон хөгжилд түлхүү анхаарах шаардлагатай тулгарсан. Монгол Улс 2027 онд гэхэд ногоон эдийн засгийг дэмжсэн, байгалийн нөөцийг тогтвортой ашигладаг, нийгмийн аливаа бүлгийг орхигдуулалгүй хүртээмжтэй эдийн засагтай, хүний эрхийг хангасан улс орон болж хөгжсөн байхын тулд НҮБ-тай нягт хамтран ажиллах болно” гэлээ.

Дэлхий нийт цар тахлын үр дагаварыг даван туулахаар хичэээж байгаа, Тогтвортой хөгжлийн зорилтыг хэрэгжүүлж дуусахад 8 жил хүрэхгүй хугацаа үлдсэн энэ цаг үед хамтын ажиллагааны хүрээнд гарын үсэг зурж буй нь туйлын чухал гэдгийг Монгол Улс дахь НҮБ-ын Суурин төлөөлөгч Тапан Мишра хэллээ. Энэхүү баримт бичгийг боловсруулахдаа Монгол Улсын Засгийн газар болон гол оролцогч талуудыг оролцуулсан өргөн хүрээний зөвлөлдөх уулзалт зохион байгуулжээ.