Хөдөлмөрийн баатар, олимпын аварга Найдангын Түвшинбаярт холбогдох хэргийн гэм буруугийн шүүх хурал өнөөдөр боллоо. Гэвч илтгэгч шүүгч Д.Доржсүрэн өөрөө хэргээс татгалзан гарах хүсэлт гаргасан тул шүүх хурал тодорхойгүй хугацаагаар хойшиллоо.

Энэ талаар Баянгол, Хан-Уул, Сонгионхайрхан дүүргийн Эрүүгийн хэргийн анхан шатны шүүхийн олон нийттэй харилцах ажилтан Ж.Оюунцэцэг дараах тайлбарыг өглөө.

"Хан-Уул дүүргийн эрүүгийн анхан шатны шүүхэд өнөөдөр Найдангын Түвшинбаярт холбогдох хэргийн гэм буруугийн шүүх хурал эхэлсэн боловчиг илтгэгч шүүгч Д.Доржсүрэн татгалзан гарах хүсэлт гаргасан тул шүүх бүрэлдэхүүн хэлэлцээд хүсэлтийг хүлээн авлаа. Ийн шүүх хуралдааныг жич зарлахаар хойшлууллаа. Учир нь шүүгчид нөлөөлөх оролдлогыг удаа дараа гаргаж байсан тул шүүгч нөлөөллийн мэдүүлэг хөтлөн Шүүхийн Ерөнхий зөвлөлд хүргүүлсэн. Уг асуудлыг ШЕЗ хэлэлцээд "шүүгчийн хараат бус байдалд нөлөөлсөн" гэж үзсэн тул цагдаагийн байгуулагад шалгуулахаар шилжүүлсэн. Цахим сүлжээ болон хэвлэл мэдээлийн хэрэгслээр шүүгчид нөлөөлөх оролдого хийж байна гэж мэдээлсэн тул шүүгч татгалзсан. Шүүх хуралдааны товыг шинээр шүүх бүрэлдэхүүн томилогдсоны дараа товлоно" хэмээн мэдээлэл өглөө. 

Эргэн сануулахад, Н.Түвшинбаяр нь 2021 оны дөрөвдүгээр сарын 2-ны өдөр согтууруулсан үедээ хохирогч Э.Энхбатыг зодож, хүнд гэмтэл учруулсан байдаг. Хохирогч удаан хугацаанд эмчилгээ хийлгэсэн ч 2021 оны арванхоёрдугаар сарын 24-ний өдөр амь насаа алдсан.

Түүнд эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 17.8 дугаар зүйлийн 1 дэх хэсэгт зааснаар Прокурорын байгууллагаас яллах дүгнэлт үйлдсэн байдаг.

Яллах дүгнэлт үйлдсэн хуулийн заалтаас:

Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1

2.1.Хүнийг онц харгис хэрцгийгээр алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.

17.8 дугаар зүйл.Эд хөрөнгө устгах, гэмтээх

1.Бусдын эд хөрөнгийг хууль бусаар устгасан, гэмтээсний улмаас бага хэмжээнээс дээш хохирол учруулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.