Цахим орчинд койн худалдан аваад хохирсон иргэдийн талаарх мэдээлэл ихээхэн гарах болсон. Тэгвэл Санхүүгийн зохицуулах хорооны Хяналт шалгалт зохицуулалтын газрын дарга Б.Долгорсүрэнгийн энэ талаарх байр суурийг хүргэж байна.
Тэрээр "Виртуал хөрөнгийн үйлчилгээ үзүүлэгчийн тухай хууль 2022 оны Хоёрдугаар сарын 25-наас мөрдөгдөж байгаа. Хууль хүчин төгөлдөр мөрдөгдөж эхэлснээс хойш дөрвөн сарын дотор аливаа виртуал хөрөнгийн үйлчилгээ үзүүлэгчийг бүртгэхгүй. Бэлтгэл ажил хангах, журам боловсруулах ёстой. Санхүүгийн зохицуулах хороо Зургаадугаар сарын 25-наас виртуал хөрөнгийн үйлчилгээ үзүүлэгчийг бүртгэнэ. Санхүүгийн зохицуулах хороо койн бүртгэхгүй. Хуулиараа койныг бирж өөрөө бүртгэж авна. Санхүүгийн зохицуулах хороо энэ бүртгэлд оролцохгүй.
Хохирсон иргэд Санхүүгийн зохицуулах хороонд хандах боломж байхгүй. Бүртгэгдсэн цагаас хойш виртуал хөрөнгийн үйлчилгээ үзүүлэгчийн койнтой холбоотой зарим нэг зохицуулалтыг хийх боломжтой болно. Одоогоор зах зээлд гарсан койныг төр бүртгээгүй байгаа. Иргэд гарсан үр дагаварыг өөрсдөө хүлээнэ. Санхүүгийн зохицуулах хорооноос койныг зохицуулах хууль батлагдаагүй тухай 18 удаа анхааруулсан" гэлээ.
