2022 оны нэгдүгээр улирлын НӨАТ-ын буцаан олголтыг иргэдийн дансанд шилжүүлж эхэллээ

2022 оны Нэгдүгээр улирлын НӨАТ буцаан олголтыг иргэдийн дансанд шилжүүлж эхэлжээ. 

Өнгөрсөн даваа гаригт шилжүүлж эхэлсэн гэж мэдээлсэн боловч иргэдийн дунд хүлээлт үүсээд байв. Тэгвэл энэ талаар Татварын Ерөнхий Газрын дарга Б.Заяабал албан ёсоор мэдээллээ. 

Тодруулбал, 1,136,755 иргэн нэгдүгээр улиралд 57.5 тэрбум төгрөгийг буцаан олголтоор авч байгаа аж. Мөн 43,162 иргэн буцаан олголтоороо хөрөнгийн татвараа төлсөн байна.

Иргэдэд НӨАТ-ын буцаан олголтыг:

• I улирлынхыг Дөрөвдүгээр сард,

• II улирлын буцаан олголтыг Долдугаар сард,

• III улирлынхыг Аравдугаар сард,

• IV улирлын буцаан олголтыг дараа оны Нэгдүгээр сард тус тус олгодог.

Өнгөрсөн оны IV улиралд нийт 1,153,999 иргэнд 64.4 тэрбум төгрөгийг буцаан олгожээ. 

НӨАТ-ын буцаан олголтыг улирал тутамд нэг удаа олгож байгаа ба иргэдийн хувьд НӨАТ-ын 2 хувийн буцаан олголтоос дунджаар 200 мянга хүртэл төгрөг авдаг гэх судалгаа гарсан.

Иргэдийн зүгээс НӨАТ-ын буцаан олголтыг нэмэгдүүлэхийг хүсч байгаа ч өнгөрсөн долоо хоногийн чуулганаар Сангийн сайд Б.Жавхлан "НӨАТ-ын сугалгааг энэ сараас зогсоож байна. Сугалаа тодорхой үүргээ гүйцэтгэсэн. Буцаан олголтыг ойрын жилүүдэд 2 хувьд тогтвортой барих бодлоготой байгаа. НӨАТ олон нийтийн анхаарлыг татдаг. НӨАТ-ын тогтолцоог хөндмөөргүй байна. Эдийн засгийн шинэ тогтолцоонд орсон сүүлийн 32 жилд бидний бий болгосон маш зөв татварын тогтолцооны нэг систем" гэсэн юм.