2022 оны төсвийн жилд нийслэл Улаанбаатар хотод улс, нийслэлийн төсөв болон Орон нутгийн хөгжлийн сангийн хөрөнгө оруулалтаар авто замын 67 төсөл, арга хэмжээ хэрэгжинэ. Тэдгээрийн 38 нь он дамжсан төсөл бол 29 нь шинээр хэрэгжих төсөл юм.
Эдгээр төсөл, арга хэмжээний талаар Нийслэлийн Замын хөгжлийн газраас тайлбар мэдээлэл өглөө.
Нийслэлийн авто замын шинэчлэлийн ажлын хүрээнд замын хашлагуудыг бүгдийг нь солих эсэх тухай сэтгүүлчдийн асуултад Нийслэлийн Замын хөгжлийн газраас авто замын газрын дарга Г.Баярсайхан "Манайд бродюр солино гэсэн тусдаа ажил байдаггүй. Тухайн замын шинэчлэлтийн явцад хамуурсан буюу элэгдсэн хашлагыг л сольдог.
Цас хайлуулахад цацдаг бодис бетонон хашлагыг эвдэж, элэгдүүлдэг. Тийм болсныг нь л сольдог бөгөөд солих шаардлагагүйг нь сольдоггүй. Манай улс ихэнхдээ бетонон бродюр хэрэглэдэг. Тэр нь цас хайлуулах бодис давс цацсантай холбоотойгоор ашиглах хугацаа нь богиносох тохиолдол гардаг" гэсэн юм.
Харин Нийслэлийн Замын хөгжлийн газрын орлогч дарга Г.Баттогтох "Хашлага солих ажил гэж байдаггүй. Замын шинэчлэлтийн ажлыг хийнэ гэдэг бол замынхаа геометр хэмжээсийг алдагдуулахгүйгээр хучилт болон явган зам, хашлагатай нь шинэчлэхийг хэлж байгаа. Их засвар гэвэл доод талын шугам сүлжээтэй нь иж бүрнээр шинэчлэхийг хэлж байгаа юм" гэлээ.
Энэ жилийн тухайд ч зам засварын ажлын хүрээнд замын хажуугийн эвдэрсэн бетонон хашлагуудыг солино. Харин хотын төв орчимд 2007 онд хийгдсэн чулуун хашлагууд хэвээр байгааг солихгүй. Эвдэрсэн хугарсан зарим хашлагыг сольж, хучилт хийнэ гэж тайлбарлав.
