Гадаадаас ирсэн иргэдийг тусгаарласан УОК-ийн шийдвэр хуульд нийцсэн эсэхийг хэлэлцэх шүүх хурал шүүх хурал өнөөдөр боллоо. Гэвч хариуцагч тал болох УОК шүүхийн тогтоосон хугацаанд нотлох баримт ирүүлээгүй, мөн товлогдсон шүүх хурал дээр нотлох баримт нэмж өгөх хүсэлт гаргасан тул шүүх хуралдаан 14 хоногийн хугацаагаар хойшилжээ.
Энэ талаар нэхэмжлэгч тал болох Фиделитас Партнерс хуулийн фирмийн зүгээс "Шүүхээс хуульд заасан ажиллагааг хийж байгаа ч хариуцагч УОК хэрэг хянан шийдвэрлэх ажиллагааг удаашруулж байна. Тодруулбал, Шүүхийн тогтоосон хугацаанд нотлох баримт ирүүлээгүй, товлогдсон шүүх хурал дээр нотлох баримт нэмж өгөх хүсэлт гаргаснаар шүүх хурлыг 2022 оны 05 дугаар сарын 03-ны өдөр байхаар хойшлууллаа" гэсэн юм.
Мөн шүүх хуралдаанд ажиглагчаар оролцох хүсэлтэй олон иргэн байгаа ч шүүхээс өмгөөлөгчийн хурлыг заалаар оруулах хүсэлтийг хангаагүй байна.
Одоогоос хоёр жилийн өмнө хилийн чанадад гацсан иргэдээ эрүүл мэнд, нас, хүйсийн ялгаатай байдлаар хязгаарлан эх орондоо ирэх эрхийг нь зөрчсөн. Арай гэж ирсэн хүмүүсийг коронавируст халдварын шинж тэмдэггүй ч 21 хоног тусгаарласан, улмаар гэртээ 14 хоног үргэлжлүүлэн хөл хорионд байлгасан зэрэг УОК-ын шийдвэрийн нөлөөгөөр хохирол амссан мянга мянган иргэн бий.
Фиделитас Партнерс хуулийн фирм "Ковид-19 цар тахлын үед захиргааны хууль бус шийдвэрийн улмаас иргэнд учирсан хохирлыг барагдуулах" НИЙТИЙН ЭРХ АШГИЙН ӨМГӨӨЛЛИЙН ТӨСӨЛ-ийг жишиг болгож сонгон ажиллаж буй. Тодруулбал, хуулийн фирмийн өмгөөлөгчдийн баг гадаадаас эх орондоо ирсэн, коронавируст халдварын шинж тэмдэггүй иргэдийг 35 /тусгаарлалтын байранд 21, гэрт нь 14 хоног/ хоног тусгаарласан УОК-ын шийдвэрийг хянуулахаар Захиргааны хэргийн давж заалдах шатны шүүхэд нэхэмжлэл гаргасан юм.
Уг нэхэмжлэлд УОК-ын 2020 оны гуравдугаар сарын 26, энэ сарын 9-ний өдрийн хурлаас гаргасан “гадаад орнуудаас ирсэн иргэдийг тусгаарлах байранд ажиглах хугацааг 21 хоног болгосон” шийдвэр нь хүчин төгөлдөр бус захиргааны хэм хэмжээний акт болохыг тогтоолгох, энэ шийдвэрийн улмаас хохирсон иргэн Б.Б-гийн хохирлыг нөхөн төлүүлэхийг даалгахыг шаарджээ.
Хэдийгээр шүүхийн шийдвэр хэрхэн гарахыг таамаглах боломжгүй ч эрх нь зөрчигдсөн иргэдийн төлөөлөл болж, хүчин төгөлдөр бус шийдвэрийн улмаас хохирсон болохыг тогтоолгох гэсэн энэхүү нийтийн эрх ашгийн төлөөх өмгөөллийн төсөл “ногоон гэрлээр” яваагүй ч, шүүхийн процессийн дагуу үргэлжилж байна.
Шүүхээс дээрх нэхэмжлэлийн шаардлагыг хангаж шийдвэрлэсэн тохиолдолд гадаадаас эх орондоо ирээд 35 хоногийн хугацаанд тусгаарлагдсан иргэн бүрт баримтаар нотлогдох хохирлоо нэхэмжилж, нөхөн төлүүлэх боломж бүрдэх юм. Албан бус тоогоор 25 мянга орчим иргэн гадаадад гацаж, эх орондоо ирээд хаана ч байхгүй 35 хоногийг өөрийн зардлаар тусгаарлалтад өнгөрүүлсэн байна.
