Монгол улсад бизнесийн байгууллагын хүний нөөцийн менежментийн эцсийн үр дүнг шинжлэх ухааны үндэслэлтэй тооцох, тодорхойлох, удирдах болон хянах онол арга зүйн үндэслэлийг дэлхийн улс орнуудын хөгжлийн хандлага, менежментийн сэтгэлгээний хөгжилд нийцүүлэн боловсруулж, мэргэжлийн хувьд сонирхолтой санал дэвшүүлсэн шинэхэн ном мэндэллээ.

Хүний нөөцийн үнэ цэнийг тооцох, хэмжих үзүүлэлтүүдийн загварыг мэдээллийн технологийн компаниуд ашиглаж, өөрсдийн хөгжүүлж буй хүний нөөцийн удирдлагын системүүдээ удирдлагын шийдвэр гаргалтыг дэмжих систем болгон өргөжүүлэх бүрэн боломжтойг уг номын агуулгаар илэрхийлж байна.

Номын нээлт өнөөдөр ШУТИС-ийн Бизнесийн ахисан түвшний сургуулийн эрдмийн зөвлөлийн танхимд болж, нээлтийн арга хэмжээнд Доктор, Дэд Профессор Г.Баттүвшин, Доктор, Дэд Профессор М.Банзрагч, Монгол улсын гавъяат эдийн засагч, Доктор (Sc.D), профессор Г.Батхүрэл, Гавъяат багш Доктор (Ph.D), Профессор Х.Пүрэвдагва, MSDI IHROC Гүйцэтгэх захирал А.Амар болон эрдэмтэн судлаачид, HR club-ийн удирдах зөвлөлийн төлөөллүүд, зохиогчийн гэр бүл шавь нар оролцлоо.

ШУТИС-ийн Бизнесийн ахисан түвшний сургуулийн захирал Доктор, Дэд Профессор Г.Баттүвшин номын нээлтийг эхлүүлж, мөн Бурханы оронд заларсан номын зохиогч Г.Гантөгсд хүндэтгэл үзүүллээ.

Номын нээлтийн үеэр Монгол улсын гавъяат багш, Удирдахуйн ухааны Доктор (Ph.D), Профессор  Х.Пүрэвдагва “Хүний нөөцийн менежмент “Шинжилгээ ба хэмжилт” номын агуулгын талаар танилцуулж, уг ном нь Шинжлэх Ухааны онол арга зүйн чухал бүтээл болж, уг бүтээлд орсон хүний нөөцийн хэмжих үзүүлэлтүүд, хүний нөөцийн мэдээллийг цэгцлэх практик санал зөвлөмжүүд нь байгууллагын онцлог, тухайн нөхцөл байдалдаа тохируулан хөгжүүлэх замаар ямар ч бизнесийн байгууллагууд ашиглаж болно. Түүнчлэн менежментийн чиглэлээр мэргэжилтэн бэлтгэж байгаа их, дээд, сургуулиудын сургалтын материал болгон ашиглах боломжтойг тодотгож, номын зохиогчийн гэр бүлд номын дээжээс гардуулан өгсөн юм. 

Номын зохиогч Шинжлэх Ухаан Технологийн Их Сургуулийн Бизнесийн Удирдлага Хүмүүнлэгийн сургуулийн багш, Дэд профессор, Бизнесийн удирдлагын ухааны доктор, Гонгоржавын Гантөгс нь 18 жилийн турш Хүний нөөцийн салбарт тасралтгүй суралцаж Олон Улсын хүний нөөцийн менежментийн онол практикийг судалж Монголын хүний нөөцийн салбарт нэвтрүүлэн судалгаа шинжилгээний ажлуудыг хийсээр 2017 онд хүний нөөцийн чиглэлээр бизнесийн удирдлагын докторын зэрэг хамгаалсан анхны судлаач эрдэмтэн юм.

Хэдийгээр хэдхэн сарын өмнө бурханы орондоо заларч мөнх бусыг үзүүлсэн ч хүний нөөцийн менежментийн салбарт оюуны бүтээлээ үлдээн, үйл хэрэг нь мөнхөд үргэлжлэн явж байна.