Өчигдөр цахим сүлжээнд дөрвөн сартай нярай хүүхдийг эцэг, эх нь гудамжинд хаяж явсан, харсан хүн нь 3 цаг орчим сахиж суусан талаарх мэдээлэл цацагдсан. Тэгвэл энэ асуудлаар болон явуулж буй үйл ажиллагааныхаа талаар Гэр бүл, хүүхэд, залуучуудын хөгжлийн газраас өнөөдөр мэдээлэл хийлээ.
"Өчигдөр Налайх дүүрэгт болсон явдалтай холбоотойгоор манай байгууллага цагдаагийн байгууллагатай хамтран газар дээр нь очиж ажилласан. Тухайн хүүхдийн эцэг, эх хүүхдээ асран хамгаалах чадваргүй, согтуурсан байдалтай байсан учраас цагдаагийн байгууллага эцэг, эхийг нь эрүүлжүүлэх арга хэмжээ авсан. Одоогоор тэднээс мэдүүлэг авч, хэргийг шалгаж байгаа.
Харин манай байгууллагаас Хүүхэд хамгааллын үйлчилгээ үзүүлэх журмын дагуу эрсдэлийн нөхцөл байдал, хүүхдийн хүчирхийллийн болон хүүхдийн гэр бүлийн байдлын нөхцөл байдлын үнэлгээг газар дээр нь хийж, тухайн хүүхдийг түр хамгаалах байранд аваад байна" гэх мэдээллийш өглөө.
Мөн тухайн хүүхэд өөрөө хөхүүл учраас аль болох ээжээс нь салгахгүй байх бодлогыг барих ба энэ арга хэмжээ нь хүүхдэд эрсдэлтэй гэж үзвэл гэр бүлтэй нь ойр байлгахгүй юм байна. Одоогоор хүүхдийг угжаар хооллож байгаа гэж мэдээлэв.
