ЦЕГ-ын дарга Ж.Болдыг огцруулахыг шаардаж, #NoDoubleStandard хөдөлгөөн өнөөдөр мэдээлэл хийлээ.
Тэдний зүгээс "ЦЕГ-ын дарга Ж.Болдод хариуцлага тооцох, цагдаагийн алба хаагч болон цагдаагийн үйл ажиллагаатай холбоотой асуудлыг шалгаж тогтоодог байгууллага алга. Хүний эрхийг зөрчиж, иргэний хүндэд халдаж, гүтгэн доромжилж байна. Ж.Болдын үйлдлийн дагуу Авлигатай тэмцэх хандсан боловч түүнд хэрэг үүсгэхээс татгалзсан" гэх мэдээллийг өглөө.
Энэ үеэр Иргэдийн хөдөлгөөний гишүүн Э.Одбаяр "Цар тахлын үед олон нийтийн арга хэмжээ зохион байгуулсан хууль бус үйлдлийг эсэргүүцэж, үзэл бодлоо илэрхийлсний төлөө баривчилж байсан. Үүний дараа ЦЕГ-ын дарга Ж.Болд орон даяар, бүх хэвлэл мэдээллийн хэрэгслээр биднийг гэмт хэрэгт гүтгэсэн. Тодруулбал, Э.Одбаяр, Д.Монголхүү тэргүүтэй хүмүүс хорих ангид хүч хэрэглэж, улмаар хоригдож байгаа этгээдийг оргуулсан гэдэг мэдээлэл тараасан.
Түүнчлэн зохион байгуулалттай удаа дараагийн үйлдлийг хийсэн байдаг.
Миний бие 461 дүгээр ангид өлсгөлөн зарлах хугацаандаа холбогдох бүх газар руу ЦЕГ-ын Ж.Болдод хариуцлага тооцож, хүн гүтгэсэн асуудлаар хяналт шалгалтын ажиллагаа явуулж өгөөч гэх өргөдлийг гаргасан. Гэвч аль нь ч шийдэгдэж тогтоогдоогүй. Цагдаагийн алба хаагч болон цагдаагийн үйл ажиллагаатай холбоотой асуудлыг шалгаж тогтоодог байгууллага алга" гэлээ.
