Засгийн газрын ээлжит хуралдаанаа "Шинэ Зуунмод" хотын хөгжлийн ерөнхий төлөвлөгөөг баталлаа.

"Шинэ Зуунмод" хот байгуулагдсанаар тус хотын дотоодын нийт бүтээгдэхүүн 2040 он гэхэд 24 их наяд төгрөг буюу 8.5 тэрбум ам.долларт хүрч Улаанбаатар хот, Хөшигийн хөндийн бүс орчим ажлын байр, орлого бүрдүүлэгч сектор болно. Шинэ хотын эдийн засгийн 0.5 хувь нь хөдөө аж ахуйгаас, 13.2 хувь нь үйлдвэрлэлээс, 86.4 хувь нь үйлчилгээний салбараас бүрдэх юм байна.

Энэ талаар Барилга, хот байгуулалтын сайд Б.Мөнхбаатар дэлгэрэнгүй танилцууллаа.

Тэрээр "Хөшигийн хөндийд баригдах хот байгуулалтуудыг үе үеийн Засгийн газар судалж, баталж ирсэн. Тухайлбал, 2019 оны нэгдүгээр сарын 19-нд Засгийн газраас шинэ нисэхийн буудлыг дагаж, аэросити байгуулна гэж төлөвлөн баталж байсан. Мөн 2020 оны дөрөвдүгээр сард УИХ-аас Майдар, Шинэ Зуунмод гэсэн орон нутгийн зэрэглэлтэй хот байх тухай шийдвэр гарч байсан.

Харин энэ Засгийн газрын үед Хөшигийн хөндийд Богдхан төмөр зам болон бусад олон төлөвлөлтийг цогц байдлаар харгалзан Шинэ Зуунмод хотын хөгжлийн ерөнхий төлөвлөгөөг баталлаа.

Уг ерөнхий төлөвлөлттэй холбоотойгоор хэсэгчилсэн төлөвлөлтүүдийг хийнэ.

Эхний үед барилгажих газар буюу онгоцны буудал, логистикийн төвийн ойролцоох инженерийн дэд бүтцийн ажлын зургийг хийж дуусаж байгаа. Дөрөвдүгээр сард цахилгаан, дулаан хангамж, цэвэрлэх байгууламж, усан сан, холбоо мэдээлэл, үерийн далан, инженерийн бэлтгэл гэхчлэн бүгдийнх нь ажлын зургийг хийж эхэлсэн бөгөөд төлөвлөлт батлагдсан тул магадлалаар орж эцэслэгдэнэ. 

Ажлын зургуудаар нийтдээ 500 орчим тэрбум төгрөгийн төсөв урьдчилсан байдлаар гарч байгаа. Энэ жил Засгийн газраас 33 тэрбум төгрөгийг инженерийн дэд бүтцийн хөрөнгө оруулалтад тавьсан" гэлээ.

Мөн тэрээр ипотекийн зээлийн талаар "2021 онд ипотекийн 8 хувийн хүүтэй зээлийг 6 хувийн хүүтэй болгож, зээлийн сан өргөтгөж хүнд хэцүү байсан ч барилгын салбарт 1 их наяд 95 тэрбум төгрөгийг оруулсан. Үүний үр дүнд 13,295 өрх орон байртай болжээ. Гэхдээ өнөөдөр ипотекийн зээлийн асуудлаас хүндрэл бий болж эхэлсэн.

Тодруулбал, 2020, 2021, 2022 онд ипотекийн зээлийн төлөлтийг хойшлуулснаас болж сан бүрдэх асуудалд хүндрэл учирч буй бөгөөд хувийн хэвшлийн барьж борлуулах байрнуудад үнийн өсөлт гарч ирж байна" гэв.