Өчигдөр “Хот, хөдөөгийн сэргэлт” хэлэлцүүлэг боллоо. Энэ үеэр Нийслэлийн Зам, тээврийн асуудал хариуцсан төслүүдийн удирдагч Б.Одсүрэн Олимпын гүүрний явган хүний замыг зургаадугаар сарын 30-нд дуусгах талаар мэдээлэл өглөө. 

Тэрээр "Олимпын гүүрний явган хүний замыг зургаадугаар сарын 30-нд дуусна. Олимпын гүүрний хажууд явган хүний зам барих боломжгүй. Учир нь цэцгэн хэлбэртэй гүүр юм. Иймд явган хүний замыг тусад нь, зэрэгцүүлээд барина.

Нэг машин нийслэлд зам ашигласны багахан төлбөр төлдөг. Энэ нь бусад улсуудаас ихээхэн бага. Машины тоо өсөх хэрээр зогсоолын төлбөр мөн өсдөг. Харин нийслэлд зогсоолын төлбөр сүүлийн жилүүдэд өсөөгүй. Баяраар 0 зогсолт болж байгаа тул цаашид машины бүртгэлийг нийслэл өөрөө хариуцдаг болно. Машины квот тогтоох асуудал ч бий. Энэ жил 5 гүүр, 4 нүхэн гарц барина. Нарны гүүрний ачааллыг бууруулахын тулд Гермес төвөөс урагш явж, ТЭЦ-4-тнй холбогдох гүүр барих юм. Ингэснээр авто замын сүлжээ 2 дахин өснө. Энэ төсөл 3-5 жил үргэлжилнэ. Энэ онд 4800 гарааш буулгана. Өнгөрсөн онд 1000 гарааш буулгасан. Буулгасан газарт нь явган хүний замууд тавина.

Мөн хашаа буулгаснаар явган зорчигчдод ээлтэй болно. "Хашаа" арга хэмжээ үргэлжилнэ. Бид явган хүний стандартаа өчигдөр батлуулсан. Стандарт мөрдүүлэхэд анхаарна. Олон хүн явдаг бол өргөн, цөөн хүн явдаг бол нарийн, явган хүний замтай байна" гэв.

Харин Зам тээврийн хөгжлийн дэд сайд Ж.Бат-Эрдэнэ "Нийт машины 56 хувь нь баруун талдаа рультэй машинуд байна. Гэтэл манай улсын замын хөдөлгөөн зүүн талдаа рультэй машинд зориулагдсан. Зөв, буруу руль нь түгжрэлээс илүүтэй замын аюулгүй байдалтай холбоотой. Осол үйлдсэн машины дийлэнх нь  баруун талдаа рультэй байна. Эдгээр машиныг Японоос импортолж байна. Буруу талдаа рультэй машиныг хязгаарлах саналыг нийслэл гаргасан, санал асуулга явуулж байна. Яам нийслэлтэй хамтран саналаа Засгийн газрын хуралдаанаар шийдүүлнэ. Мөн нэг жилийн болон арван жилийн насжилттай машинд ижил татвар төлдөг нь шударга бус" гэсэн юм.