Хотын дарга асан Э.Бат-Үүл өлсгөлөн зарлах болсноо мэдэгдээд буй. Энэ тухай түүний өмгөөлөгч Г.Пүрэвдулам өчигдөр орой мэдээлсэн. Түүний сүүлд бичсэн Украйны талаарх нийтлэлийн дараа хорих 409-р ангийн удирдлага Э.Бат-Үүлийн захидал харилцааны эрхийг нь хасчээ. Энэ үйлдлийг Э.Бат-Үүл дээрээс, прокурорын өгсөн үүрэг даалгавар хэмээн үзэж, хууль зөрчин хүний эрхийг гаргуунд нь гаргасан энэ үйлдлийг нь эсэргүүцэн хорих ангийн дотор өлсгөлөн зарлахаар болсон.

Тэгвэл Э.Бат-Үүлийн бие муудсан талаар түүний хүү Б.Чулуудай цахим хуудаснаа мэдээллээд байна. 

Тэрээр "Аавын минь биеийн байдал муудаж эрүүл мэндээрээ хохирвол Монгол улсын ерөнхий прокурор Б.Жаргалсайхан та бүрэн хариуцах болно. Та ЭБШХ, ЭХ, ПТХ,ШТХ-ыг удаа дараа зөрчиж Монгол улсын Баатар миний аавыг залхаан цээрлүүлж байна. Аавын минь үзэл санааг хорьж, хууль зөрчиж хүний эрхэнд халдахаа зогсоо!!" хэмээжээ.

Дашрамд, өлсгөлөн зарлах энэ үйлдэл нь тэмцлийн хамгийн хурц хэлбэрт тооцогддог бөгөөд хоригдлын амь нас, эрүүл мэндэд аюултай юм.