Эн сарын 15-ны орой Нийслэлийн 97-р сургуулийн хоёрдугаар ангийн сурагч охины ээж цахим хуудаснаа "ангийн багш нь охиных нь гарыг улайж, хавдтал нь цохисон" гэх мэдээлэл нийтэлсэн. Улмаар энэ асуудал олон хүний анхааралд өртөж, цахим орчинд хэлэлцүүлэг өрнүүлж байна. 

Мөн 97-р сургуулийн Ёс зүйн хороо өчигдөр хуралдаж тухайн багшийг ажлаас нь чөлөөлөх шийдвэр гаргажээ. Багш Л.Цэрэнбадам долоон настай охиныг алгадсан гэдгээ хүлээн зөвшөөрч уучлалт гуйсан байна. Тэрээр охиныг "нэг удаа цохисон" гэх ба хохирогч сурагч охин ч мөн "багш нэг удаа цохисон" гэж хэлсэн байна.

Тэгвэл тухайн охинтой нэг ангид өнгөрсөн жил хамт сурч байсан хүүхдийн ээж tsahiur.mn сайтад хандан тухайн охины аав нь түүнийг зоддог байж болзошгүй гэсэн мэдээлэл өгчээ.

Тэрээр "Тухайн хэрэгт холбогдоод буй багш 1-р ангийнхаа хүүхдүүдийн унших чадварыг сайжруулахын тулд хичээлийн дараа авч үлдэн "үеээр уншуулах" дасгал хийлгэдэг байсан. Тэр үеэр багшдаа зодуулсан гэх сурагчийг авч үлдэн уншуулж байхад түүний ээж, дүүг нь тэврэн ирж байсан. Дүү нь уйлж байсан учраас багш нь "за, гэрт нь сайн уншуулаарай" гээд гаргасныг би тод санаж байна. Тэр үед багш "Охины биен дээр янз бүрийн улайсан толбо үүсээд байна, охиноос асуухаар "аав зодсон" гэж хэллээ. Аавд нь хүүхэд битгий зодоод бай гэж хэлээрэй" гэх үгийг хэлж байсан. Тэгэхэд ээж нь юу ч хэлэлгүй охиноо аваад гарсан" гэжээ. 

Харин болоод буй асуудлаар өнөөдөр Боловсролын сайд Л.Энх-Амгалан тайлбар мэдээлэл хийв. 

Тэрээр "2022 оныг БШУЯ "Ёс зүйн" жил болгон зарласан. Яагаад ингэж зарлах болсон шалтгаан бол сургуулийн орчинд гадуурхалт, дээрэлхэлт их байгаа юм. Сургууль, цэцэрлэгийн орчинд ийм асуудлууд үргэлж гарч байгаа. Үүнийг бид нар харсан ч хараагүй юм шиг, сонссон ч сонсоогүй юм шиг өнгөрөөж болохгүй. Цаашдаа бид багш нарын ёс зүйн асуудлыг өндөр түвшинд гаргаж ирж тавих болно. 

Тухайн багш 30 жил ажилласан туршлагатай, зөвлөх багш байсан. Гэвч энэ үйлдийг бид хэрхэвч зөвтгөж болохгүй, хариуцлага тооцох ёстой. Нэг талаасаа багш нар ачаалал ихтэй, цалин өндөр авах ёстой гэх боловч нөгөө талаасаа хүүхдийн хувь заяаг шийдвэрлэж буй чухал ажил тул бид үүрэг, хариуцлага шаардаж ажиллах болно. Цаашдаа багш нартаа хүмүүнлэг, сэтгэл зүрхний боловсрол олгох тал дээр анхаарах болно. Өнөөдрийн хүүхдийг өчигдөрийн арга зүйгээр сургах юм бол тэр хүүхдүүдийн ирээдүйг хулгайлж буй гэмт хэрэг болно" гэлээ. 

Мөн тэрээр "Нийгмийг харахад хоёр хуваагдсан байх шиг байна. Нэг тал нь багшаа өмөөрөөд, нөгөө тал нь багшийг буруутгаж байх шиг байна. Үүнийг ард түмэн үнэн мөнөөр нь шүүх ёстой. Би бичлэгийг нь үзсэн. Үнэхээр хүүхэд зодсон. Зодох зодохдоо нилээн хүнд хэлбэрээр зодсон бичлэг байгаа юм байна лээ. Өрөвдөөд байх шаардлага байхгүй. Энэ явдал гашуун ч гэсэн цаашдаа сургамж болох ёстой" гэв.