Ерөнхий сайд Л.Оюун-Эрдэнэ өнөөдөр олимпын наадмаас медаль хүртсэн тамирчдыг хүлээн авч уулзаж, Засгийн газрын тогтоолоор баталсан шагналыг гардууллаа.
Ерөнхий сайд Л.Оюун-Эрдэнэ "Монгол Улс 1961 онд туурга тусгаар улсаа зарлаж, НҮБ-д элссэн. 1964 оны Токиогийн олимп Монгол Улс тусгаар улсынхаа хувьд оролцсон анхны олимпын наадам байсан. Үүнээс хойш хагас зуун жил дараа цар тахлын амаргүй үед Токиод дахин зохиогдсон наадамд манай улс спортын 10 төрөлд 43 тамирчин, зуны паралимпод зургаан төрлөөр 11 тамирчин оролцсон. Амаргүй сорилтын дундаас манай тамирчид нэг алт, нэг мөнгө, гурван хүрэл медалийг хүртэж, алтан соёмбот төрийнхөө далбааг Токиогийн тэнгэрт мандуулсан та бүхнээр бахархаж байгаагаа илэрхийлье.
Сарын өмнөөс Ерөнхий сайд өөрөө удирдах таван үндэсний хороог байгуулсны нэг нь олимпызмыг дэлгэрүүлж, амьдралын чанарыг цогцоор дээшлүүлэх үндэсний хороо юм. Энэхүү хорооны ажлын хүрээнд эрүүл, эртэч монголчуудыг бий болгож, улмаар олимпизмыг томоохон соёл болгон төлөвшүүлэхэд та бид хамтдаа ажиллах чухал үйлсийн өмнө байна. Гуравхан жилийн дараа Парист болох олимпод бэлтгэх үндэсний хороо байгуулагдаад байна. Үндэсний хорооны даргын хувьд шаардлагатай бүх асуудлыг анхаарлын төвд байлгаж дэмжин ажиллах болно. Засгийн газраас Үндэсний шигшээ багийн бэлтгэл сургуулилтад онцгой анхаарна.
Парис-2024 зуны, паралимпын наадамд олон эрх авч, Европын тэнгэрт Монгол төрийн дууллыг олон удаа эгшиглүүлж, Монгол төрийн алтан соёмбот далбаагаа олон удаа мандуулахын өлзийтэй сайхан ерөөлийг өргөн дэвшүүлье” гэлээ.
