Ерөнхий сайд Л.Оюун-Эрдэнэ өнөөдөр олимпын наадмаас медаль хүртсэн тамирчдыг хүлээн авч уулзаж, Засгийн газрын тогтоолоор баталсан шагналыг гардууллаа.

Зуны Олимпын их наамдаас жүдо бөхийн эрэгтэйчүүдийн 81 кг-ын жинд Саиед Моллай мөнгөн медаль, -73 кг-ын жинд Ц.Цогтбаатар хүрэл медаль, эмэгтэйчүүдийн 48 кг-ын жинд Монгол Улсын гавьяат тамирчин М.Уранцэцэг хүрэл медаль, чөлөөт бөхийн төрөлд эмэгтэйчүүдийн 53 кг-ын жинд Б.Болортуяа хүрэл медаль хүртсэн билээ. Мөн паралимпын хүндийг өргөлтийн -107 кг жинд Монгол Улсын Гавьяат тамирчин Э.Содномпилжээ алтан медаль хүртсэн юм.

Монгол Улсын Засгийн газрын тогтоолоор:

• Паралимпын хүндийг өргөлтийн төрөлд алтан медаль хүртсэн Э.Содномпилжээд 3 өрөө орон сууц, 120 сая төгрөг, 

• Жүдо бөхийн эрэгтэйчүүдийн төрөлд мөнгөн медаль хүртсэн Саиед Моллайд 2 өрөө орон сууц, 60 сая төгрөг, 

• Жүдо бөхийн эмэгтэйчүүдийн төрөлд хүрэл медаль М.Уранцэцэг, жүдо бөхийн төрөлд хүрэл медаль хүртсэн Ц.Цогтбаатар нарт тус бүр 2 өрөө орон сууц, 30 сая төгрөг,

• Үндэсний шигшээ багийн дасгалжуулагч Х.Болдбаатарыг 45 сая төгрөгөөр,

• Үндэсний шигшээ багийн дасгалжуулагч М.Бундмааг 15 сая төгрөгөөр,

• Үндэсний шигшээ багийн дасгалжуулагч Д.Баттулгыг 60 сая төгрөгөөр, 

• Олимпын наадмын боксын төрөлд тавдугаар байрт шалгарсан Үндэсний шигшээ багийн тамирчин Э.Цэндбаатарыг 20 сая төгрөгөөр, 

• Олимпын наадмын чөлөөт бөхийн төрөлд тавдугаар байр эзэлсэн Б.Хонгорзулыг 20 сая төгрөгөөр, 

• Олимпын наадмын чөлөөт бөхийн төрөлд тавдугаар байр эзэлсэн Үндэсний шигшээ багийн тамирчин Ц.Намуунцэцэгийг 20 сая төгрөгөөр,  

• Паралимпын жүдо бөхийн төрөлд тавдугаар байр эзэлсэн Үндэсний шигшээ багийн тамирчин Н.Алтанцэцэгийг 20 сая төгрөгөөр,

• Үндэсний шигшээ багийн 3*3 сагсан бөмбөгийн эмэгтэйчүүдийн багийг 30 сая төгрөгөөр,  

• Жүдо бөхийн төрлийн шүүгч Т.Энхцэцэгийг 10 сая төгрөгөөр, 

• Хүндийг өргөлтийн төрлийн шүүгч Л.Одгэрэлийг 10 сая төгрөгөөр, 

• Байт харвааны төрлийн шүүгч Э.Саруулыг 10 сая төгрөгөөр, 

• Триатлон төрлийн шүүгч Б.Цагаанбаатарыг 10 сая төгрөгөөр, 

• Олимпын наадамд эх орноо төлөөлөх оролцох тамирчин, дасгалжуулагч нарын хувцасыг зохион бүтээсэн Michel&Amazonka брэндийг 10 сая төгрөгөөр тус тус шагнаж, батламж гардууллаа. 

Шагнал гаруулах ёслолын үеэр Олимпын мөнгөн медальт Саиед Моллай "Бүх монголчууддаа мэндчилгээ дэвшүүлж байна. Өнөөдөр олимпын болон паралимпын медаль хүртсэн тамирчдад баяр хүргэж, хүлээн авч буйд Монгол Улсын Ерөнхий сайд болон Монголын ард түмэнд баярлалаа. Мөн Ерөнхийлөгчид баярлалаа. 

Олон хоногийн өмнө "Саид Моллай Герман улсын иргэншил авах гэж байна" гэсэн хуудал мэдээлэл тархсан тухай би сонссон. Үүнийг үгүйсгэж байна. Би Монгол Улсын паспорттай. Би бол Саиед Моллай. Би Монголын иргэн. Энэ медаль бол Монголын ард түмнийх. Тийм учраас Монголын ард түмэн худал мэдээлэлд бүү итгээрэй гэж хэлье. Би Монголын ард түмэнд хайртай. Би Герман улс руу үе үе явж, бэлтгэл хийж, ажилладаг. Худал мэдээлэлд бүү итгээрэй гэж хүсэж байна.

Намайг байнга дэмжиж, эрч хүч хайрладаг Монголын ард түмэнд баярлалаа. Би удахгүй бэлтгэлдээ орж, "Парис-2024" олимпод оролцон, монголчуудддаа илүү их амжилтаар бэлэг барихыг хүсэж байна.

Монголын ард түмэн, Монголын жүдо бөхийн холбоо, ноён Х.Баттулга болон Монголын үндэсний олимпын хороонд дахин талархал илэрхийлж байна. Олимпод амжилттай оролцож, медаль хүртсэн тамирчдад байр олгосонд баяртай байна. Одоогоор би зочид буудалд байрлаж байгаа. Цаашид буудалд байрлах шаардлагагүй болсондоо баяртай байна.

Ойрын зорилго гэвэл "Гранд слам"-д оролцож магадгүй. Одоогоор би Бундеслигт барилдаж байгаа. Хуруундаа бага зэргийн бэртэл авсан. Бэлтгэлээ дахин эхлүүлж, ирэх жил Азийн наадам, ДАШТ-д оролцох төлөвлөгөөтэй байгаа. Ирэх жилүүдэд болох тэмцээн Монголын спортод маш чухал тул би сайн бэлтгэх ёстой. Хичээнэ ээ" гэлээ. 

Олимпын наадмын хүрэл медальт Б.Болортуяа, тавдугаар байр эзэлсэн тамирчин М.Лхагвагэрэл нар Норвеги улсын Осло хотноо зохиогдох гэж буй насанд хүрэгчдийн чөлөөт бөхийн дэлхийн аварга шалгаруулах тэмцээнд оролцохоор явсан тул өнөөдрийн шалгнал гардуулах арга хэмжээнд оролцоогүй байна.

Мөн “Токио-2020” олимпын наадмын хүндийг өргөлтийн төрөлд дөрөвдүгээр байр эзэлсэн М.Анхцэцэг, боксын шүүгчээр ажилласан Ц.Цогтгэрэл нар хүндэтгэх шалтгааны улмаас мөн ирээгүй байна.