1990 оноос хойш төрсөн буюу 30-аас доош насны эцэг эхчүүд хүүхдэдээ онцгой анхаарал хандуулж байгааг судалгаагаар тогтоожээ.
Хойд хөршийн сургалтын арга барилыг шууд хуулсаар ирсэн манай улс 1958 оноос хойш хүүхэдтэй холбоотой хоёр л судалгаа хийж байжээ. Харин боловсролын хүрээлэн 2013-2017 онд Монгол хүүхдийн цогц хөгжлийн судалгааны эхний үе шатыг хийсэн байна. Энэ судалгааг үргэжлүүлэх шаардлагатай байгааг боловсролын хүрээлэнгийнхэн Боловсролын сайд Л.Энх-Амгаланд уламжилжээ.
2-21 хүртэлх насны хүүхдийг хамруулсан суурь судалгааг 2-3 удаа хийж байж нарийвчилсан дүгнэлт гарах боломжтой аж.
Монгол хүүхдийн цогц хөгжлийн судалгааны хоёр дахь шатны судалгааг Улаанбаатар, Дорнод, Хөвсгөл аймагт явуулсан ч хөрөнгө мөнгөний бэрхшээлээс болоод зогсжээ. Суурь судалгааг үргэлжлүүлэх 70 сая төгрөгийг БШУ-ны яамнаас шийдвэрлэхээр болсон байна.
Цаашид хүүхдээ бүрэн дүүрэн судалж байж хөтөлбөр агуулгаа сайжруулах шинэчлэх боломж бүрдэх талаар сайд дурьдсан юм.
Судалгааны үр дүнгийн талаар сонирхолтой жишээг Н.Бэгз багш ярив. Тэрээр "Биеийн тамирын хичээлийн дараа математик оруулбал сурагчдын хүлээж авах чадвар эрс буурдаг. Сурагчдын гэр сургууль хоёрын хоорондын зай 2 км дотор байх нь сурлагад сайнаар нөлөөлдөг" гэсэн юм.
