Боловсролын сайд Л.Энх-Амгалан Боловсролын хүрээлэнд өнөөдөр ажиллалаа. 

Тэрээр "Боловсролын хүрээлэнд өнжлөө. Хэлж яриад байдаггүй ч хийсэн ажил их байна. Хөтөлбөр, аргазүй боловсруулах, үнэлгээний аргачлал тогтоож, төрөлжсөн судалгаа хийх, ном товхимол, гарын авлага, бичиг баримт боловсруулах чиглэлд олон ажил хийсэн ч үүний хэрэгжилт хангалтгүй байна. Замын зураглалаа гаргачихсан ч тэр замаар бид морьтой шогшиж байна. Морио машин болгож хурдаа нэмэх шаардлагатай болжээ.

Сургалтын чанарт ХӨТӨЛБӨР, БАГШ, ОРЧИН хамгийн чухал нөлөө үзүүлнэ. Алтан гурвалжин гэж тодорхойлж болох үндсэн асуудалд онцгой анхаарна. Чанар бол бидний хүсэж буй түвшин юм. Бид хүссэн түвшиндээ хүрээгүй байгааг олон статистик харуулдаг. Сурагч төвтэй сургалтын арга барилд бид бүрэн шилжээгүй байна. Сурагчид мэдэх ёстой агуулгынхаа 35-50 хувийг эзэмшиж байна гэдэг бол хангалтгүй үзүүлэлт юм.

Энэ хугацаанд бид дөрвөн удаа хөтөлбөрийн шилжилт хийжээ. Нэг хөтөлбөр сонгоод эхлүүлдэг ч үр дүнг нь үзэлгүй, багш сурагчдад хугацаа олголгүй дараагийн хөтөлбөрт шилжиж байсан нь алдаа. Цаашид хөтөлбөрийг үр дүнг нь гартал тууштай хэрэгжүүлэх бодлого барина" гэлээ.