Comedy Lab-ын комедиан Д.Амартүвшин цахим хуудсаараа дамжуулан өнөөдөр болсон үйл явдал дээр үзэл бодлоо илэрхийллээ.

Тэрээр "УОК өөрсдийн алдаа болохоор "Өө дэлхийгээрээ ийм байна" гэдэг. Харин иргэдийг болохоор "иргэдийн буруу" иргэд болохгүй байна гэнэ. Өчигдөрийн франк ямар хууль тогтоомж зөрчсөнийг ойлгосонгүй. Яг ямар хууль бариад "хавьтал" гэдэг үгийг буруу ашигласан гэж дүгнэж цагдаагаар дарамталж байгааг ойлгосонгүй. Ер ийм сонин дарамталдаг өнгө аяс гараад ирлээ. Өөрсдөө ажлаа хамгийн муу хийдэг. Маш олон иргэдийн амь нас, эрүүл мэндийг золиослон байж хилээ хаасан байж. УОК-ын хараа хяналтанд байдаг газраас вирусаа алдсан. Өөрсдийнх нь хариуцлага хаана байна. Тэгсэн хэдэн залуу франк хийсний төлөө хариуцлага тооцно гэнэ. Өөрсдийнх нь хариуцлага хаана байна. УОК иргэдийн үг хэлэх, үзэл бодлоо илэрхийлэх эрхийг хаах нь буруу. Энэ маазралт яг хэнд гай болоод байна. Энэ үйл явдал хүний үндсэн эрх болох үг хэлэх, үзэл бодлоо илэрхийлэх эрхэнд маш томоор халдаж байгаа үйл явдал. Одоо УОК-ыг шүүмжилж болохгүй болох юм байна л даа. Ингэж болохгүй. Эдийн засгаа хөмөрчөөд өөрсөддөө яагаад хариуцлага тооцохгүй байгаа юм бэ? Бусдын эрхэнд халдахгүйгээр үзэл бодлоо илэрхийлэх эрхэнд хэн ч халдах ёсгүй" гэв.

Өнөөдөр Эрүүл мэндийн яамны ээлжит мэдээллийн үеэр УОК-ын шуурхай штабын дарга Б.Ууганбаяр "УОК-ын нэрийг барьж нэгнээрээ тохуурхсан байдалтай, маазарсан ёс бус бичлэг хийсэн залуусыг холбогдох байгууллагаар шалгуулна" хэмээн мэдэгдсэн. 

Харин үүний дараа UB Comedy-гийн комедиан Б.Идэр-Од өөрийн фейсбүүк хуудаснаа "Коронавирусийн эсрэг тэмцэх ёстой үнэт цагийг нь алдагдуулсан хошигнол хийж Улсын Онцгой Комиссын ажлыг шаардлагагүй өөр зүйлд чиглүүлсэн чирэгдэл учруулсандаа уучлал хүсье" хэмээн мэдэгдсэн билээ.