Арванхоёрдугаар сарын 14-ний 06:00 цагаас эхлэн Улаанбаатар хотод хөл хорионы дэглэмийг сулруулж, бүх нийтийн бэлэн байдлын зэргийг өндөржүүлсэн бэлэн байдлын зэрэг болгон бууруулхаар боллоо.

Мөн Улаанбаатар хотод даваа гаригаас эхлэн 34 чиглэлийн үйлчилгээний байгууллагын үйл ажиллагааг нээхээр боллоо.

Засгийн газрын хуралдааны үеэр Ерөнхий сайд У.Хүрэлсүх иргэддээ хандан мэдээлэл хийсэн юм.

Тэрээр "Коронавирус шинээр илрэх болон халдварын тоо харьцангуй цөөрч халдварыг хяналтдаа авсан гэж үзэж байна. Гаргасан шийдвэрүүдийг ухамсартайгаар дагаж мөрдсөнд Монголын ард иргэддээ Засгийн газраас талархсанаа илэрхийлье.

Өвчлөлийг тодорхой хэмжээнд хяналтандаа авсан гэж үзэж байгаа. 

Бид түүхэндээ анх удаа бүх нийтийн бэлэн байдлын зарласан. Энэ ажлыг хийж хэрэгжүүлэхэд хүндрэл бэрхшээлтэй олон асуудлууд байсан. УОК-оос гаргасан шийдвэрүүд анхан шатандаа очоод хэрэгжихгүй байх, төрийн албан хаагчдын хоорондын хамтын ойлголцол, уялдаа холбоо жигдэрч чадаагүй улмаас зарим алдаанууд гарсан. Үүн дээр УОК онцгойлон дүгнэлт хийж ажиллаж байгаа. Хариуцлага, сахилга бат, дэг журмийг улам сайжруулах шаардлагатай гэж харагдаж байгаа. Үүнээс мөн олон сургамжтай зүйлүүд болсон. 

Энэ ажлуудаас болж ард иргэдээ бухимдуулсан, хүний алтан амь хохирсон энэ тохиолдлуудад ард иргэдээсээ уйчлал гуйж байгаагаа албан ёсоор илэрхийлж байна. Цаашид бид ард иргэдийнхээ амь нас, аюулгүй байдлыг төлөө бүхий л боломжийг дайчлан ажиллах болно. Би нэг зорилгын төлөө хамтарч ажиллаж чадлаа. Үүний маань үр дүнд ч гарч байна. 

Энэ гаргасан ололт амжилтаа бататгаж цаашид бид монгол хүний уужуу тайван, хүлээцтэй, үндэс угсаагаа гэсэн ухаан бодлоо улам тэнийлгэж, төр засгийнхаа заавар зөвөлгөөг ягштал биелүүлэхийг ард иргэлээсээ уриалж байна. 

Энэ өвчний эсрэг тэргүүнд эгнээнд явж байгаа эмч, эмнэлгийн ажилтан болон бусад төрийн албан хаагч нартаа дахин талархал илэрхийлье. Та бүхний ажлын үр дүнд бид ард иргэдийнхээ аюудгүй байдлыг хангаж чадлаа" гэлээ. 

Мөн тэрээр үргэлжлүүлэн цаашид баримтлах арга хэмжээний талаар үүрэг өгөв. 

Тэрээр "Бүх шатанд ажиллаж байгаа төрийн алба хаагчдын сахилга бат, ажлын хариуцлагыг сайжруулах шаардлагатай. Ажил ацаглаж болохгүй. Гаргасан шийдвэрүүд хэрэгжих ёстой. Ард иргэдэд бухимдал үүсгэж болохгүй. Бүгд бухимдалтай байгаа. Хорио цээрийн дэглэм хүндрэлтэй зүйл. Бүгдийн ажил мэргэжилтэй холбоотой. Заримдаа хүний эрх, эрх чөлөөнд халдан хэрэгжиж байгаа. Дэлхий тэр аяаараа бухимдалтай байгаа. Хүн төрөлхтөн. Гэхдээ бид энэ бүхнийг давж гарах ёстой. 

Ирэх даваа гаригаас бүх нийтийн бэлэн байдлыг өндөржүүлсэн бэлэн байдалд шилжүүлж байна. Хуучин дэглэмээр цаашид үргэлжлүүлнэ. Бид түүхэндээ улсын хэмжээнд анх удаа бүх нийтийн бэлэн байдлыг зарлаж, хорио цээрийн дэглэмд оруулсан. Энэ ажлуудыг хийж хэрэгжүүлэхэд хүндрэлтэй зүйл олон байсан. 

Хорио цээрийн дэглэмийн үед ард иргэдийн хариуцлага юу юунаас илүү чухал байна.

Төр, хувийн хэвшил, иргэний хамтын ажиллагаа маш чухал боллоо. Маскаа зүү гэж шаардлага тавих ёстой. Ингэж байж бид олсон ололт амжилтаа бататгаж чадна. 

Монголчууд бид цөөхүүлээ. Гуравхан сая. Бидэнд хамгийн үнэтэй зүйл бол ард түмний маань амь нас, эрүүл мэнд. Би ард иргэдийнхээ амь насыг нэгдүгээрт тавьж байгаа. Хоёрт улс орны эдийн засаг. Бид цар тахлыг амжилттай давж чадвал энэ бүгдийг аварч чадна" гэлээ.